Հայաստանի Հանրապետության 2015թ. պետական բյուջեի նախագծի հիմքում դրված են Ազգային ժողովի կողմից հաստատված կառավարության ծրագրի, ինչպես նաև կառավարության ընդունած՝ ՀՀ 2014-2025թթ հեռանկարային զարգացման ռազմավարական և 2015-2017թթ. պետական միջնաժամկետ ծախսերի ծրագրերի դրույթները: Այս մասին Ազգային ժողովի լիագումար նիստում ՀՀ 2015թ. պետական բյուջեի քննարկմանն ասաց ՀՀ ֆինանսների նախարար Գագիկ Խաչատրյանը: «2015թ. կառավարության սոցիալ-տնտեսական քաղաքականությունը, ինչպես և նախկինում հիմնականում միտված է լինելու մակրոտնտեսական կայունության ապահովմանը՝ ապահովելով կայուն տնտեսական աճ»,- նշեց նախարարը:
Ներկայացնելով ՀՀ 2015թ. պետական բյուջեի նախագծի ցուցանիշները՝ Գագիկ Խաչատրյանն ընդգծեց, որ նախագծով ՀՆԱ-ի իրական աճը ծրագրավորված է 4.1 տոկոս, ՀՆԱ-ի դեֆլյատորի մեծությունը 3.3 տոկոս, 12-ամսյա գնաճի թիրախը 4 +/- 1.5 տոկոս: «2014թ. սպասվող ծավալների նկատմամբ 2015թ. դոլարային արտահայտությամբ ապրանքների ներմուծման աճը ծրագրավորվել է 3.7 տոկոս, իսկ արտահանմանը՝ 5.2 տոկոս: Արդյունքում 2015թ. ապրանքների ներմուծումը և արտահանումը համապատասխանաբար կկազմեն 3 միլիարդ 974 միլիոն ԱՄՆ դոլար և 1 միլիարդ 768 միլիոն ԱՄՆ դոլար, ապրանքային հաշվեկշիռը՝ 2 միլիարդ 206 միլիոն ԱՄն դոլար պակասուրդով»,- նշեց Խաչատրյանը:
