Այսօր Ազգային ժողովի նիստում Կառավարության հետ հարցուպատասխանի ժամին «Ժառանգություն» խմբակցության անդամ Զարուհի Փոստանջյանը հորդորեց Կառավարությանը՝ աշխատել օրենքի սահմաններում ու չծանրաբեռնել դատական համակարգը իրենց կողմից ներկայացված հայցերով: Նա նշեց, որ գրավոր հարցում է ուղարկել Կառավարություն ու պատասխան չի ստացել՝ հավելելով, որ ականատես է եղել, թե Կառավարությունն օրենքի ինչ խախտմամբ է Սուրիկ Խաչատրյանին մարզպետ նշանակել:
Արդարադատության նախարար Հովհաննես Մանուկյանը պատասխանեց, որ գրավոր հարցը սահմանված կարգով չի ներկայացվել ու այդ պատճառով էլ որպես պատգամավորական հարցում չի ներկայացվել, ամեն դեպքում՝ այդ հարցը կուսումնասիրվի:
Պատգամավորի բուն հարցը վերաբերում էր «Սևան» ՔԿՀ-ի բանտարկյալներից մեկի՝ Անդրանիկ Բեգլարյանի նամակում արծարծված խնդրին: «Այդ կալանավորը դատապարտվել է երկու տարվա ազատազրկման, ութ ամիս է՝ պատիժ է կրում, չափանիշներն ունի, որ ենթարկվի պայմանական ազատազրկման, բայց չի ենթարկվել: Այսօր շուրջ չորս հազար կանալավոր կա ՀՀ-ում, ու կարող ենք թեթևացնել մեր կալանավայրերը, օգնել, որ նրանք ազատ արձակվեն ու ինտեգրվեն հասարակության մեջ»,-ասաց Փոստանջյանը՝ հավելելով, որ քաղաքացին գողացել է մի քանի բջջայն հեռախոս, ծնողազուրկ է, ունի ինը ամսական երեխա:
Հովհաննես Մանուկյանն ասաց, որ նախարարը չի կարող տիրապետել բոլոր դատապարտյալների քրեական պատմությանը: «Սևան» ՔԿՀ-ում, որպես կանոն, կրկնահանցագործներն են գտնվում, և շատ հնարավոր է, որ այդ անձը վարքագծի խնդիր է ունեցել ՔԿՀ-ում, որովհետև դա էական նշանակություն ունի պայմանական ազատության դեպքում»,-ասաց նա:
Ամեն դեպքում՝ նա խոստացավ ուսումնասիրել այս կանալավորի գործն ու մանրամասները ներկայացնել պատգամավորին: Ինչ վերաբերում է պայմանական ազատազրկման ծրագրին, ապա նախարարն ասաց, որ հայեցակարգը հիմա մշակվում է:
