Նիկոլ Փաշինյանն ԱՄՆ մեկնելուց առաջ խոստացել էր ընդունել կառավարության մոտ պարբերաբար հավաքվող զոհված զինծառայողների ծնողներին, ովքեր հանդիպում են պահանջում կառավարության ղեկավարի հետ իրենց խնդիրները ներկայացնելու համար:
Այն ժամանակ կառավարությունից հայտնեցին, որ ԱՄՆ-ից վերադառնալուց հետո վարչապետը կընդունի ծնողներին, սակայն դա տեղի չունեցավ:
Կառավարության վերջին նիստի օրը՝ հոկտեմբերի 10-ին, ծնողները կրկին հավաքվել էին կառավարության մոտ ու հանդիպում էին պահանջում վարչապետի հետ, սակայն նա կրկին չհանդիպեց, քանի որ այդ օրը մեկնելու էր Հայաստանից:
Կառավարության մոտ գտնվող ծնողներին, մասնավորապես՝ Մարգարիտա Խաչատրյանի հետ զրուցել էր վարչապետի օգնական Նաիրի Սարգսյանը, ով հայտնել էր, որ վարչապետը մեկնում է երկրից (Թուրքմենստան) և նշել, որ մյուս (այս) շաբաթ՝ երկուշաբթի կամ երեքշաբթի կառավարության ղեկավարը կընդունի մայրերին:
Այսօր չորեքշաբթի է, հանդիպման մասին որևէ տեղեկություն չկա: Վաղը կառավարության հերթական նիստն է ու պարզ կլինի՝ արդյո՞ք վարչապետն ընդունել է որդեկորույս մայրերին, թե՝ կրկին հարմար չէ:
