Հայաստան Քաղաքականություն 

Գոնե Դո՛ւք ձայններդ կտրեք, լռե՛ք և մի՛ զբաղվեք երեսպաշտությամբ. Նորայր Նորիկյան

Փաստաբան Նորայր Նորիկյանը ֆեյսբուքյան իր էջում գրում է.

«Այսօր մտովի վերհիշեցի, թե 2007թ. նոյեմբեր ամսին ոստիկանության Երեւան քաղաքի Մաշտոցի բաժնի աշխատակիցն ինչպես էր այցելել մեր բնակարան և ինձ հիշեցնում էր, որ ես երկու մանկահասակ երեխա ունեմ, որ լավ կլինի, որ ինձ և նրանց չվտանգեմ՝ խորհուրդ տալով ձեռնպահ մնալ հասարակական-քաղաքական գործունեությամբ զբաղվելուց:

Ի դեպ, վերը նշվածի մասին գործող վարչապետը հիշատակել էր 2010թ. ընթացող իր դատավարության ժամանակ:

Այսօր նաև վերհիշեցի, թե 1985 թվականին, երբ ես ընդամենը 7 տարեկան էի, ու դեռևս Խորհրդային Միությունը գոյություն ուներ, այն ժամանակվա միլիցիայի աշխատակիցներն ինչպես էին եկել մեր տուն և ստուգում էին մեր բակի ասֆալտի և տան պատերի գաջի հաստությունը:

Իհարկե՛, իրողություններն ու ժամանակները տարբեր են, իհարկե՛, երբեք չի կարելի երեխաներին դարձնել թիրախ իրենց ծնողների գործունեության համար: Այստեղ որևէ այլ կարծիք լինել չի կարող:

Բայց ինձ այլ հարց է մտահոգում: Մենք երբեք չենք կարողանա ստեղծել այն հասարակությունը և պետությունը, որի մասին երազում ենք, եթե մենք չվերափոխենք մեր հասարակական գիտակցությունը և մեր արժեքային համակարգը:

Այսպիսի ընկալումներով մենք երբեք չենք կառուցի բարեկեցիկ, հզոր ու արժանապատիվ Հայաստանի Հանրապետություն:

Այսօր դեռևս կա այդ հնարավորությունը՝ փոխվելու և փոխելու, և մեզանից է կախված, թե մենք արդյո՞ք կունենանք այդքան ողջամտություն՝ օգտագործելու նպաստավոր հնարավորությունը, թե՞ ոչ...

Եվ վերջում, երբ տեսնում եմ, թե ովքեր են այսօր կրծքով պաշտպանում Հրայր Թովմասյանին, ուղղակի ապշում եմ: Գոնե Դո՛ւք ձայններդ կտրեք, լռե՛ք և մի՛ զբաղվեք երեսպաշտությամբ…»:

  •  
  •  
  •  
  • 1
  •  
  •  
  •  
  •  
  •  
    1
    Share

Նույն շարքից