Ես Սարհատ Պետրոսյանի հետ խոսել եմ մինչև հրաժարականի դիմումի մասին հրապարակումը: Նա ներկայացրել է իր տեսակետները, իր ունեցած խնդիրները Քաղաքաշինության կոմիտեի նախկին ղեկավարի հետ, ով հիմա իր խորհրդականն է, և ներկա ղեկավարի հետ: Այս մասին լրագրողների հետ զրույցում հայտարարեց փոխվարչապետ Տիգրան Ավինյանը՝ խոսելով Կադաստրի կոմիտեի ղեկավար Սարհատ Պետրոսյանի հրաժարականի մասին:
Ավինյանի խոսքերով, Պետրոսյանի հրաժարականի տրամաբանությունն իր համար մի փոքր ընդունելի չէ, որովհետև դա նույն է, որ Առողջապահության նախարարը հրաժարական տա, քանի որ չի համաձայնվում Աշխատանքի և սոցիալական հարցերի նախարարի քաղաքականության հետ:
Ինչ վերաբերում է Պետրոսյանի հայտարարությունն այն մասին, որտեղ նա խոսում է կոռումպացվածության մասին, Ավինյանն առաջարկեց Պետրոսյանից անպայման պարզաբանում ստանալ. «Սա ինձ համար էլ է նորություն: Կոռումպացվածության մասին խոսք մեր զրույցի ժամանակ չի եղել»:
Ավինյանը Պետրոսյանի հրաժարականից հետո վարչապետի հետ այդ մասով քննարկում չի ունեցել:
Փոխվարչապետի խոսքերով, Պետրոսյանի հայտարարություն իր համար ինքնին անհասկանալի էր:
Ավինյանը նշեց, որ Սարհատ Պետրոսյանի աշխատանքը բավականին դրական է գնահատում:
Հարցին՝ հնարավոր է արդյո՞ք, որ Պետրոսյանը նոր պաշտոն ստանա, Ավինյանը նշեց, որ նման հարց չի դիտարկվում այս պահին: