ԲՀԿ խմբակցության պատգամավոր Միքայել Մելքումյանն այսօր լրագրողների հետ զրույցում, խոսելով Րաֆֆի Հովաննիսյանի այն հայտարարությունից, թե եռյակը միասնական չէ, ասաց, որ «Ժառանգություն» խմբակցությունը եռյակի ձևաչափում ներկյացուցիչներ ունի, և եթե իրենք իսկապես խնդիրներ են տեսնում, կամ եթե դժգոհություն կա եռյակից, թող գան ու բարձրաձայնեն:
«Եթե ինքը ոճի առումով կողմ է ավելի կտրուկ քայլերով առաջ գնալուն, ապա դա պետք է ընդունվի եռյակի առաջնորդների կողմից, և առաջ շարժվեն: Եթե կա համագործակցության ծրագիր, որը արդեն հաստատված է, ապա պետք է դրանով առաջ շարժվել»,- ասաց Մելքումյանը:
Դիտարկմանը, որ Րաֆֆի Հովհաննիսյանը հայտարարել է նաեւ, որ «Ժառանգությունը» հեռուստատեսություն, փող և մեքենա չունի, որ մարդկանց հանրահավաք բերի` նկատի ունենալով ԲՀԿ-ին, Միքայել Մելքումյանն ասաց, որ այս պահի դրությամբ` եռյակը մոբիլիզացրել է խորհրդարանական և արտախորհրդարանական ուժերը, և երբ ասում են ուժերի մոբիլիզացիա, միայն մարդկանց նկատի չունեն, այլ այն բոլոր հնարավորությունները, որոնք առկա են:
«Եթե Րաֆֆի Հովհաննիսյանը ցանկանում է շարժումը տեմպի առումով արագացնի, չեմ ասում դեմ եմ, բայց կողմ եմ, թող գա քննարկի, ո՞վ է դեմ: Կա եռյակի ինստիտուտ, ուրեմն որոշումները այդտեղ են կայացվում: Իր ներկայացուցիչները չե՞ն եռյակում, եթե իր ներկայացուցիչների հետ խնդիր ունի, ինչ ասեմ…»,- ասաց Միքայել Մելքումյանը:
Նշենք, որ ԲՀԿ խմբակցության պատգամավոր Տիգրան Ուրիխանյանը նշեց, որ զերծ է մնում Րաֆֆի Հովհաննիսյանի հայտարարությունները մեկնաբանելուց: