Որպես Պաշտպանության նախարար՝ ես կցանկանայի, որ մեր բյուջեն կրկնապատկվեր ու եռապատկվեր, սակայն հաշվի առնելով մեր տնտեսական հնարավորությունները՝ այսօրվա բյուջեն բավարար է, որ մենք բոլոր մարտահրավերներին պատշաճ ձևով արձագանքենք: Այս մասին լրագրողներին հայտնել է ՀՀ Պաշտպանության նախարար Դավիթ Տոնոյանը:
Տոնոյանը նշել է, որ նախորդ տարվա հետ համեմատած, բյուջեն քիչ չէ. «Բյուջեի կառուցվածքում եղել են որոշ նվազեցումներ մեր տրամադրած վարկային չափաբաժնի մեջ, որն ուղղվել է մեր կարողությունների ավելացմանը»:
Հարցին, թե ի վերջո երբ Հայաստան կգան Սու-երը նախարարը նշել է, որ դրանք ժամանելու են կամ դեկտեմբերին, կամ՝ հունվար-փետրվարին. «Ես այդ մասին արդեն ասել եմ»:
Նախարարն ասել է, որ այսօր ՀՀ ԶՈւ-երը ձեռք են բերում մեծամասամբ նոր, արդիականացված զինատեսակներ. «Դա վերաբերում է և 2019 թվականին, և 2020 թվականին: Եվ պայմանագրային, և վարկային ծրագրերի միջոցով ձեռք են բերվելու միայն նոր ու արդիական զինատեսակներ: Ձեռք ենք բերելու տարբեր երկրներից: Մտքում 4 երկիր պահեք»: