Ես շատ դժգոհ եմ այն վերաբերմունքից, որը ԿԳՄՍ նախարար Արայիկ Հարությունյանն ունի կրթության նկատմամբ: Այս մասին լրագրողների հետ զրույցում հայտարարեց ԵՊՀ ուսանողական խորհրդի նախագահ Դավիթ Ափոյանը:
Այս պահին ԵՊՀ բանասիրական ֆակուլտետում ակցիա է ընթանում ընդդեմ հայոց լեզվի, պատմության և գրականության առարկաների պարտադիր ուսուցումը բուհական ծրագրերից հանելու նախագծի:
Ափոյանի խոսքերով, այսօր կրթությունն ամենաթողության է մատնված. «Մայր բուհն այսօր կառավարության, նախարարության ուշադրության կենտրոնում չէ: ԿԳՄՍՆ-ն առհասարակ ուշադրություն չի դարձնում կարգուկանոնին: Այսօր հենց ԿԳՄՍ նախարարի հովանավորչությամբ շատ ավելի մեծ կուլիսային խոսակցություններ կան, դրանց վերջը պետք է տրվի: Կրթությունն առաջընթաց չի գրանցում: Եթե հետընթաց չկա էլ, հաստատ տեղում դոփում է»:
Խոսելով ռեկտորի պաշտոնակատարի դիրքորոշման մասին՝ Ափոյանն ասաց, որ վերջինս ուսանողներին որևէ քննարկում չի առաջարկել. «Օդում կախված լուրերի համաձայն, նա հանդիպում է ունեցել դեկանի հետ: Այսօր դեկանն այստեղ չէ, ու ինձ համար տարօրինակ է, թե ինչու նա այստեղ չէ: Ես չեմ ցանկանում որևէ մեկին մեղադրել, սակայն ինձ ինֆորմացիա է հասել, որ փորձ է արվում դեկանների միջոցով հարցին ստվերային լուծում տալ»:
Ափոյանի խոսքերով, եթե բուհական ծրագրերի հետ կապված խնդիրներ կան, կարելի է վերանայել, սակայն պետք չէ ուղղակի վերցնել ու հանել առարկաների պարտադիր ուսուցումը:
