Մոտ մեկ ժամ առաջ ԱԳՆ մասնաշենք ժամանած ՀՀ վարչապետ Նիկոլ Փաշինյանը, ինչպես «Արայիկ, հեռացիր» վանկարկումների ներքո եկել էր, այնպես էլ նույն վանկարկումների ներքո հեռացավ ԱԳՆ-ից, որտեղ մասնակցեց երիտասարդ դիվանագետների երդման արարողությանը և դիվանագիտական դպրոցի ստեղծման տասնամյակին նվիրված միջոցառմանը:
Երբ վարչապետը հեռանում էր նախարարությունից, նրան մոտեցավ մի կին, ով հայտարարեց, որ ինքն Ալավերդիից է ու ուզում է անպայման խոսել վարչապետի հետ: Վերջինս չմերժեց:
Տիկնոջ բողոքը վերաբերում էր Ալավերդիում համար 11 դպրոցի տնօրեն Անահիտ Ծատինյանին: Սակայն նա մինչ այդ հասցրեց հայտարարել, որ ընտրություններից առաջ ասել է, որ ընտրելու է Նիկոլ Փաշինյանին ու որ ամբողջ Ալավերդիում են խոսում՝ «Գոհարը Նիկոլ Փաշինյանի ընկերն է». «Ես էլ ասում եմ՝ թող այդպես էլ իմանան»:
Տիկինը նշեց, որ դպրոցի տնօրենը 40 մարդու ներկայությամբ ավտոբուսի կանգառում պայուսակով հարվածել է իր գլխին. «Դրանից հետո սկսեց գազանաբար քաշքշել ուսերիցս: Գնացի հիվանդանոց, բժիշկները նայեցին, 15 օր պառկել եմ բուժվելու»:
Տիկինն ակնկալում է, որ կհեռացնեն դպրոցի տնօրենին, ով անգրագետ է ու տնօրեն է նստել նախկին մարզպետի օրոք:
Վարչապետը խոստացավ հետաքրքրվել հարցով, սակայն որևէ բան չխոստացավ:
