«Հանրապետական» կուսակցության երիտասարդներն այսօր ՀՀ արտաքին գործերի նախարարության դիմաց նախ հանդես են եկել հայտարարությամբ, ապա դատարկ ճամպրուկ հանձնել ԱԳՆ ղեկավար Զոհրաբ Մնացականյանին, փոխանցում է Aysor.am-ը:
«Հաշվետու եղեք հասարակությանը, թե որ փուլում է գտնվում Արցախը բանակցային սեղանին վերադարձնելու ձեր վարչապետի խոստման իրականացումը և երբ է այն իրականացվելու։
Տեղեկացրեք՝ Մինսկի ո՞ր համանախագահն է համաձայնել «արցախյան հակամարտության լուծումը պետք է ընդունելի լինի երեք ժողովուրդների համար» բանաձևին։
Պատասխան տվեք հայ ժողովրդին, թե ինչու է իշխանափոխությունից հետո Մինսկի խմբի համանախագահների հայտարարություններից անհետացել Արցախի հիմնախնդրի համար կարևորագույն ազգերի ինքնորոշման իրավունքը։
Եվ վերջապես բացատրեք, թե ինչպես տեղի ունեցավ, որ բանակցային գործընթացից դուրս եկան Վիեննայի և Սանկտ Պետերբուրգի պայմանավորվածությունները։
Պատկերավոր ասած, պարո՛ն նախարար, Դուք ձախողակ եք», - հայտարարել է կուսակցության ներկայացուցիչ Հայկ Մամիջանյանը։
Նա ասել է, դե դատարկ ճամպրուկ հանձնելով ուզում են ցույց տալ, թե այս կառավարությունը այն կառավարությունն է, որին ճամպրուկներ են բերում, և դրանք դատարկ են, ինչպես իրենց խոստումները։
«Դատարկ են, ինչպես ՀՀ արտաքին քաղաքականության օրակարգը։
Ճամպրուկներից մեկը սիրով կթողնենք Զոհրաբ Մնացականյանին, քանի որ շատ քիչ ժամանակ է մնացել, որ Զոհրաբ Մնացականյանը դառնա Գնացականյան», - հայտարարել է Հայկ Մամիջանյանը։
