Խորհրդարանն առաջին ընթերցմամբ չընդունեց «Իմ քայլը» խմբակցության պատգամավոր Աննա Կարապետյանի ներկայացրած «Ազգային ժողովի կանոնակարգ» սահմանադրական օրենքում լրացում կատարելու մասին» և «Անվտանգության խորհրդի կազմավորման և գործունեության մասին» օրենքում փոփոխություններ և լրացում կատարելու մասին» օրինագծերի փաթեթը։ ԲՀԿ-ն ձեռնպահ քվեարկեց, ԼՀԿ-ն՝ դեմ, քանի որ առաջարկները չէր ընդունվել:
Ավելի ուշ իմքայլական Վլադիմիր Վարդանյանը չկարողացավ չանդրադառնալ քվեարկությանը՝ աչք փակելով այն բանի վրա, որ այլ հարց է քննարկվում. «Մենք գործ ունենք սահմանադրական օրենսդրության հետ և մենք խոսում ենք խորհրդարանական երկիր կառուցելու մասին:
Մենք խոսում ենք խորհրդարանի դերի բարձրացման մասին, մենք խոսում ենք նրա մասին, որ ոչ թե կաբինետիզմ պետք է լինի ՀՀ-ում, այլ լինի ընդհակառակը: Մենք խոսում ենք խորհրդարանական վերահսկողության գործիքակազմի մասին, այն ամրացնելու մասին:
Երեկ մենք որևիցե բացասական ելույթ չենք լսել: Մենք ենթադրում էինք, որ կմիանան մեզ, սակայն դրա փոխարեն ԼՀԿ-ն դեմ է քվեարկում, իսկ ԲՀԿ-ն՝ ձեռնպահ՝ դա անելով առանց որևիցե հիմնավորման»:
ԲՀԿ-ական պատգամավոր Միքայել Մելքումյանը չկարողացավ չպատասխանել. «Պարոն Վարդանյանը ցանկանում է ցուցումներ տալ քաղաքական խմբակցություններին, դրա համար ստիպված եմ խոսել:
Պարոն Վարդանյան, դուք ի՞նչ իրավունքով եք ցուցում տալիս երկու քաղաքական ուժի՝ պահանջելով հիմնավորում ներկայացնել ձեզ, թե ոնց են քվեարկելու: Դուք ցուցում տալու իրավունք չունեք: Ամեն ինչ իր հիմնավորումն ունի: Կա քաղաքական ու մասնագիտական որոշում:
Մենք պետք է վերաիմաստավորենք մերժումների, քննարկումների որակը: Ո՞վ է ասել, որ կառավարության կամ այլ օրենքները շատ որակյալ են: Երբ մենք կողմ ենք քվեարկում, մեր կուսակցական շահը ստորադասում ենք պետական շահին: Այսինքն, այդ օրենքի մեջ կարող է ընդամենը մեկ դրույթ լինի դրական, բայց մենք կողմ ենք քվեարկում: Երբեմն կիսաարհամարհական ժպիտներ ենք տեսնում, էս ի՞նչ բան է: Եթե աշխատում ենք, եկեք աշխատենք»:
Մելքումյանը խոսեց նաև երեկ տեղի ունեցածի մասին՝ հայտարարելով, որ Գևորգ Պետրոսյանի տեսակետն ամբողջ խմբակցության տեսակետն է. «Դուք ուզում եք ցուցումներ տա՞լ, չի հաջողվելու: Մենք մեր տեսակետերը միշտ արտահայտելու ենք: Եթե դուք այդպես շարունակեք, դնելու եք պառլամենտարիզմի ճգնաժամի սկիզբը: Դա ձեզ չի հաջողվելու: Մենք միշտ մնալու ենք»:
Ելույթով հանդես եկավ նաև ԼՀԿ-ական Տարոն Սիմոնյանը: