Որոշում կայացնելուց առաջ խորհուրդ կտամ վերցնել Հայոց լեզվի ամբիոնի դասագրքերը, ծրագրերը, ծանոթանալ դրանց, ինչից հետո միայն որոշում կայացնել: Նախ ծանոթացեք, թե ինչով է զբաղվում Հայոց լեզվի դասախոսը համալսարանում: Այս մասին լրագրողների հետ զրույցում հայտարարեց Ժամանակակից Հայոց լեզվի ամբիոնի դասախոս, գիտությունների թեկնածու, դոցենտ Ռիտա Սաղաթելյանը:
Տիկին Սաղաթելյանի խոսքերով, հիմա խոսում են այնպիսի մարդիկ, ովքեր ընդհանրապես ծանոթ չեն վերոնշյալին. «Հանրության մոտ տպավորություն է ստեղծվում, թե հայագիտական ամբիոններն այսքան տարի զբաղվել են ձրիակերության:
Մենք գիտնական ենք, մենք դաս սերտող տվողներ չենք: Մենք լավ ենք հասկանում մեր առջև ծառացած խնդիրները: Մենք արդեն ձեռնամուխ ենք եղել գործընթացը, որպեսզի մեր համալսարանը հասցնենք Օքսվորդի մակարդակին: Հայագիտությունը չի գտնվում արկածախնդիրների, պատահական մարդկանց, մաֆիոզների ձեռքում, այն գտնվում է շատ պատրաստված գիտնականների ձեռքում: Մենք լավ գիտենք, թե ինչպես պետք է զարգացնել Հայոց լեզուն»:
Սաղաթելյանը հայտարարեց, որ տարիներ առաջ իրենք տեղում չեն դոփել, եթե նախարարությունը միայն առաջ գնալու մասին հիմա է մտածում, ամբիոնում վաղուց են արդեն այդ մասին մտածում ու քայլեր ձեռնարկում: