Սենատոր Լինսի Գրահամը «վետո» է կիրառել Հայոց Ցեղասպանության բանաձևի նկատմամբ: Նա ներկա է եղել Թրամփ-Էրդողան հանդիպմանը:
Նշենք, որ այս օրերին Ռեջեփ Թայյիբ Էրդողանը ԱՄՆ-ում է, քաղաքական հանդիպումներ է ունենում ԱՄՆ բարձրաստիճան պաշտոնյաների հետ:
Analitik.am-ի հետ զրույցում քաղաքագետ Սուրեն Սարգսյանը նշեց, որ սենատոր Լինսի Գրահամի «վետոն» ևս մեկ փորձ է ԱՄՆ Սենատում տապալել Հայոց Ցեղասպանության բանաձևի քննարկումը և քվերակումը:
«Սենատոր Գրեհամը բավականին հաջողված փորձ է արել տապալելու բանաձևը, քանի որ վետոյից հետո կարող են Սենատում հարցը չքննարկել»,-ասաց նա:
Քաղաքագետի խոսքերով ԱՄՆ 100 սենատորներից յուրաքանչյուրն իրավունք ունի վետո կիրառել, ինչի արդյունքում հարցը կամ նախագիծը կարող է դուրս գալ Սենատի օրակարգից․ «Չնայած դրան, վետոյի հաղթահարման մեխանիզմների հնարավորություններ դեռ կան, սակայն բավականին բարդ գործընթաց է»,-ասաց Սարգսյանը:
Հարցին՝ Էրդողանի, թե՞ Թրամփի կողմից է եղել վետոյի անհրաժեշտության հիմնավորումը, քաղաքագետը կարծիք հայտնեց, որ «մեծ է եղել Էրդողանի դերը»:
«Բացի այն, որ Էրդողանն է ակտիվ աշխատել, թուրքական լոբբին ևս ակտիվ աշխատել էր Վաշինգտոնում, որ գոնե սենատորներից մեկը վետո կիրառի և բանաձևը ոչ թե գնա քվերակության, այլ պարզապես հարցը թաղվ»,-ասաց նա:
Սարգսյանը նաև հաղորդեց, որ Լինսի Գրահամն աշխատել է հայերի համար կարևոր նախագծերում և այժմ էլ նրա հետ աշխատանքներ կտարվի, որ գոնե վետոն փոխարինվի դեմ քվերակությամբ:
Նա նշեց, որ սենատորին ներկայացվել է, թե Հայոց Ցեղասպանության բանաձևի քննարկումը կամ ընդունումը Սենատում ինչ բացասական հետևանքներ կարող է ունենալ: Նաև նրա կողմից վետո կիրառելու անհրաժեշտությունն է հիմնավորվել:
«Թուրքիայի նախագահն է խոսել, ուրեմն ՀՀ վարչապետը պետք է պատասխանի»,-շեշտեց Սարգսյանը:
Գոհար Ստեփանյան