Մեծի տանն Կիլիկիո կաթողիկոս Արամ Ա.-ն Վատիկանում հանդիպել և առանձնազրույց է ունեցել Հռոմի պապ Ֆրանցիսկոսի հետ, ինչից հետո նրանք եղել են Վատիկանի մեծ սրահում, որտեղ նրանց սպասել են այլ բարձրաստիճան հոգևորականներ, սփյուռքահայ գործիչներ, տեղեկացնում է կաթողիկոսարանի ֆեյսբուքյան էջը:
Արամ Ա.-ն հիշեցրել է, որ դեռևս Կիլիկյան շրջանից սկսած հատուկ հարաբերություններ ու սերտ համագործակցություն է եղել հայ և կաթոլիկ եկեղեցիների միջև։
Իր խոսքում Վեհափառն անդրադարձել է երկու կարևոր հարցի։ Նա հիշեցրել է Միջին Արևելքի լուրջ խնդիրներն ու դրանց հետևանքները եկեղեցական կյանքի և վկայությունների համար։
Արամ Ա.-ն նաև անդրադարձել է Հայոց ցեղասպանությանն ու հիշեցրել, որ Օսմանյան Թուրքիայի իրականացրած ցեղասպանությունից հետո հայ ժողովուրդը մեկուկես միլիոն նահատակ է տվել, կորցրել է իր եկեղեցիները, մշակութային և հոգևոր արժեքները, հետևաբար` Հայոց ցեղասպանության ճանաչումն ու հատուցումը յուրաքանչյուր հայի պահանջն է։
Ֆրանցիսկոս պապն իր հերթին դիմել է Վեհափառ հայրապետին և ուրախություն հայտնել, որ առաջին անգամ հանդիպում է նրան։
Հռոմի պապն անդրադարձել է նաև Հայոց ցեղասպանությանն ու նշել, որ հայ ժողովրդի պատմությունը լի է եղել հալածանքներով և նահատակություններով։
Պաշտոնական արարողությունից հետո Արամ Ա-ն ճաշել է Պապի հետ։
