Այսօր՝ նոյեմբերի 19-ին, խորհրդարանն առաջին ընթերցմամբ ընդունեց, այսպես կոչված, օրենքով գողերի մասին նախագիծը:
Խորհրդարանում լրագրողների հետ զրույցում Արդարադատության նախարար Ռուստամ Բադասյանը, պատասխանելով հարցին՝ կարող է արդյո՞ք Հայաստանում գտնվող օրենքով գողերի անուններ հնչեցնել, նշեց, որ իրավապահ մարմիններին հայտնի են ՀՀ-ում գործող բոլոր օրենքով գողերի անունները. «Ես կարող է մի քանի անուն հիշեմ, մի քանիսը չհիշեմ: Սակայն ես անուններ չեմ հրապարակի, քանի որ հասարակության համար դա այնքան պարզ է, որ հավելյալ պարզաբանումների կարիք չկա»:
Օրենքի ընդունումից հետո, Բադասյանի խոսքերով, եթե քրեական հեղինակությունները շարունակեն անել այն, ինչը հիմա անում են ու եթե դա նախագծի հոդվածներով պատժվելու ենթակա է, պատասխանատվության կենթարկվեն:
Առանձին դեպքերում մինչև 20 տարի ազատազրկում է նախատեսվում:
Բադասյանը որևէ սպառնալիք կամ միջնորդավորված որևէ բան չի ստացել «գողական աշխարհից»: