Ես բացառում եմ, որ այսօրվա իշխանությունից որևէ մեկը կապեր կունենա քրեական հեղինակությունների հետ՝ որպես քրեական հեղինակություն և այդ հարաբերությունների շրջանակներում: Այս մասին լրագրողների հետ հանդիպմանը հայտարարել է Իմ Քայլի պատգամավոր Սուրեն Գրիգորյանը:
«Եթե այնպես է ստացվել, որ կա անձնական բնույթի հարաբերություն, որը եկել է երկար տարիներից, չի կարելի մարդուն ասել՝ եթե փողոցում իրար տեսնում եք, ճանապարհը փոխեք»,-ասաց Գրիգորյանը՝ հիշեցնելով, որ օրինակ Սերժ Սարգսյանը ժամանակին հանդիպել է քրեական հեղինակությունների հետ, ինչը վկայող առնվազն մեկ տեսանյութ ինքը գիտի:
Ինչ վերաբերում է դիտարկմանը, որ Սերժ Սարգսյանն ընդհանուր խնջույքի ժամանակ է հանդիպել քրեական հեղինակությունների հետ, Իմ քայլի պատգամավորը նշեց. «Պետական պաշտոնյայի մասով եք հարցնում, հետո խոսում եք երկրի նախագահի մասին: Երկրի նախագահը մի քիչ ավելի է, քան՝ պետական պաշտոնյան: Օրինակ, եթե ես լինեի երկրի նախագահ ու մինչ այդ ունենայի ծանոթ քրեական հեղինակություններ, առնվազն հրապարակային մակարդակում կդադարեցնեի շփումները, որպեսզի մարդկանց մոտ սխալ տպավորություն չստեղծվի, որը շատ առողջ է»:
Նշենք, որ Սերժ Սարգսյանը քրեական հեղինակությունների հետ հանդիպել է հեռավոր 1993 թվականին, երբ դեռ նախագահ չէր: