Աբխազիայում, որտեղ այսօր անցկացվում են նախագահի արտահերթ ընտրություններ, ժամը 8:00-ին բացվել են 32 շրջաններում գտնվող բոլոր 154 ընտրատեղամասերը: Բացվել են նաև երկրի սահմաններից դուրս երեք ընտրատեղամասեր՝ Մոսկվայում, Չերկեսկում և Ստամբուլում:
Նախագահի պաշտոնի համար պայքարում է չորս թեկնածու: Պետության ղեկավարի արտահերթ ընտրություններն անցկացվում են նախկին նախագահ Ալեքսանդր Անկվաբի հրաժարականի առիթով, ով լքել է իր պաշտոնը այս տարվա մայիսին ընդդիմության պահանջով:
Աբխազիայի ԿԸՀ տվյալների բազայում առկա է մոտ 130 հազար ընտրող:
Ավելի վաղ Վրաստանի Արտաքին գործերի նախարարությունը հայտարարել է, որ Աբխազիայում նախագահի ընտրություններ անցկացնելը հակասում է իրենց օրենսդրությանը: Վրաստանի սահմանադրության համաձայն, Աբխազիան համարվում է Վրաստանի մաս։ Սակայն, փաստացի, Աբխազիան Վրաստանի կենտրոնական իշխանությունների կողմից չի վերահսկվում։
Արտաքին գործերի եվրոպական ծառայությունն էլ (ԱԳԵԾ) հայտարարել է, որ Եվրամիությունը չի ճանաչում Աբխազիայի նախագահի ընտրությունները, քանի որ աջակցում է Վրաստանի տարածքային ամբողջականությանն և ինքնիշխանությանը, ինչը ճանաչված է միջազգային իրավունքով:
