ԿԳՄՍ նախարար Արայիկ Հարությունյանի պաշտոնանկության պահանջով նախարարության մոտ նստացույց անող ՀՅԴ երիտասարդներն այսօրվա ասուլիսի ժամանակ ևս մեկ անգամ հայտարարեցին, որ կրթության ոլորտում խնդիրների բարձրաձայնմամբ հանդես չեն գալիս միայն ՀՅԴ-ականները՝ հիշատակելով ԵՊՀ բանասիրական ու պատմության ֆակուլտետիների ուսանողների մասին, ովքեր դասադուլ էին հայտարարել:
ՀՅԴ-ականները հիշեցրեցին նաև ԵՊՀ դասախոսների մասին, ովքեր մեկ օր նախազգուշական գործադուլ հայտարարեցին, իսկ ավելի ուշ նաև հանդիպեցին նախարարի հետ:
Բացի դրանից, կրթության ոլորտում առկա խնդիրների մասին բարձրաձայնել են նաև մի շարք հասարակական գործիչներ, մտավորականներ:
Երիտասարդները խոսեցին նաև Հարությունյանի պաշտոնակության պահանջով ԱԺ ԼՀ և ԲՀ խմբակցություններին նամակով դիմելու մասին՝ հայտնելով, որ վերջիններս ասել են, թե խմբակցություններում պետք է քննարկեն հարցը, ինչից հետո կհրապարակվի պատասխանը:
ՀՅԴ-ականները դադարեցնում են նստացույցը և պատրաստվում են հանդիպել Արայիկ հարությունյանի հետ՝ քննարկելու առկա խնդիրները:
