Արդյոք մեզ առաջարկվում են սահմանդրական փոփոխություններ, թե նոր սահմանադրություն են մեզ մատուցում: Այս մասին Հայաստանում սահմանադրական փոփոխություններ իրականացնելու թեմայով քննարկմանը հայտարարեց ԱԺ ՀԱԿ խմբակցության ղեկավար Լևոն Զուրաբյանը: «Արդյոք նոր փոփոխությունների հիմքում ընկած չէ բոլորովին այլ խորհրդարանական մոդել: Սահմանադրական փոփոխությունների շղարշի ներքո փորձ է արվում ներդնել կառավարման նոր մոդել»,- նշեց Լ. Զուրաբյանը:
Ըստ նրա՝ այս սահմանադրական փոփոխությունները արվում են այն բանի համար, որ Սերժ Սարգսյանը «հավերժ իշխի Հայաստանում»: ՀԱԿ խմբակցության ղեկավարը վստահեցնում է, որ իրենք դա թույլ չեն տա:
Ի տարբերություն ՀԱԿ-ի՝ ՀՅԴ խմբակցությունը կողմ է Հայաստանում սահմանադրական փոփոխություններ իրականացնելուն և տեսնում դրա անհրաժեշտությունը: ՀՅԴ պատգամավոր Արծվիկ Մինասյանը քննարկմանը իր ելույթում շեշտեց, որ սա իրավիճակային մոտեցում չէ: «Ներկա կառավարման մոդելը իշխանության գերկենտրոնացում է, սա ընդունում են բոլորը: Իշխանության բոլորը ճյուղերը զրկված են ինքնուրույնության հնարավորությունից»,- նշեց Ա. Մինասյանը:
Ըստ նրա՝ Հայաստանի սահմանադրության թերությունների հետևանքով ունենք դատական ոչ անկախ իշխանություն: Փոփոխությունների կարևոր հարցերից մեկը անկախ դատական մարմին ստեղծելն է: Հաջորդը հանրաքվեի թերի ինստիտուտն է ու անկախ ընտրական մարմնի բացակայությունը:
Ըստ Ա. Մինասյանի՝ մինչև փոփոխությունները անհրաժեշտ են երաշխիքներ՝ ինչ ենք ուզում փոխել:
