Այսօր՝ նոյեմբերի 26-ին, Երևան քաղաքի ընդհանուր իրավասության դատարանում Ռոբերտ Քոչարյանի պաշտպանները բացարկի միջնորդություն ներկայացրեցին դատախազ Կարեն Բիշարյանին:
Բացարկի մասով դիրքորոշում հայտնեց նաև փաստաբան Միհրան Պողոսյանը, ում խոսքի ժամանակ միջադեպ տեղի ունեցավ նրա ու Բաղդասարյանի միջև:
Պողոսյանը հայտարարեց, որ 2018 թվականի փետրվարի 23-ին Կարեն Բիշարյանը ԱԺ ամբիոնից հստակ հայտարարել է, որ ՀՀ-ում 2008 թվականին բարձր զինվորական դասային աստիճաններ ունեցող անձանց նկատմամբ քրեական հետապնդում, նույնիսկ հարցաքննության հրավիրելու որևէ հանգամանքներ առկա չեն. «Նույնը վերաբերել է նաև ՀՀ նախագահներին վերաբերող հարցերին:
Պետք է հուսանք, որ պարոն Բիշարյանն այդ հարցերին պատասխանելիս չի առաջնորդվել որևէ քաղաքական հրահանգով, ուղղակի պատվերով, այլ իրացրել է իր լիազորությունները: 2018 թվականի ապրիլ-մայիսին տեղի ունեցած հայտնի իրադարձություններից հետո սույն քրեական գործի ընթացքն ամբողջությամբ փոխվել է, այն փոխվել է նույն դատախազի հսկողության տակ գտնվող քրեական գործով, սակայն փաստական հանգամանքները որևէ կերպ չեն ավելացել այդ ընթացքում»:
Պողոսյանի խոսքերով, եթե առանց որևէ նոր փաստական հանգամանքի, գործի ընթացքը փոխվում է, ակնհայտ է դառնում, որ դատախազը գործում է ոչ թե օրենքով, այլ որոշակի քաղաքական պահանջներին համահունչ. «Կամ պարոն Բիշարյանը 2018 թվականի փետրվարին է քաղաքական պատվեր կատարել, կամ հիմա է կատարում: Երկու պարագայում էլ նա չի գործում օրենքով: Այդ հիմքով ենթակա է բացարկման»:
Բաղդասարյանը հայտարարեց, որ առարկում է:
«Ես Ձեզ չէի ընդհատում»,-արձագանքեց Պողոսյանը:
Դատախազի հաջորդ արձագանքին, փաստաբանը հայտարարեց. «Դու ինձ մի ասա, թե ես ինչ անեմ»:
Դատախազն ասաց, որ կարող է ասել:
«Չես կարող ասել, տեղդ նստի»,-ասաց Պողոսյանը:
«Դու չպետք է ասես, թե ով ինչ անի»,-պատասխանեց Բաղդասարյանը:
Բաղդասարյանը պնդեց դատավորին կարգի հրավիրել փաստաբանին:
«Դու ինձ մի ասա ես ինչ անեմ, կկտրեմ ձայնդ չես մոռանա»,-ասաց Բաղդասարյանը՝ դիմելով փաստաբանին:
«Արա, դու ի՞մ հետ ես ըտենց խոսում: Ձեն կտրողին նայի հլը, փորձի հլը»,-ասաց Պողոսյանը:
Դատավոր Աննա Դանիբեկյանը ստիպված ընդմիջում հայտարարեց:
Ընդմիջումից հետո դատավոր Աննա Դանիբեկյանը հայտարարեց, որ դատարանի նկատմամբ անհարգալից վերաբերմունք է ցուցաբերվել, ինչի համար դատարանը Միհրան Պողոսյանին և Գևորգ Բաղդասարյանին նկատողություն հայտարարեց։