Ինչպես արդեն հայտնել ենք, ԵՊՀ մի խումբ ուսանողներ ակցիա են անում համալսարանի կենտրոնական մասնաշենքում՝ հանդիպում պահանջելով ռեկտորի պաշտոնակատարի հետ, ով մերժել էր ուսանողների հետ հանդիպումը:
Քիչ առաջ ռեկտորի պաշտոնակատարն ամեն դեպքում հանդիպեց ուսանողների հետ՝ հայտարարելով, որ ուսանողների նամակին պատասխանել է:
Ուսանողները հայտարարեցին, որ պատասխանն իրենց չի բավարարել, դրա համար ուզում են հանդիպել:
Ռեկտորը նշեց, որ իր պատասխանում ամեն ինչ հստակ գրված է:
Ուսանողներից Գլուլումյանը հայտնեց, որ ուզում են քննարկել հարցը, քանի որ իրենց էլ դասադուլները ձեռնտու չեն:
«Ազնվորեն ասեք, որ սա դասադուլ չէ, դասի չնտսել է»,-հայտարարեց ռեկտորի պաշտոնակատարը:
Ուսանողը չհամաձայնվեց:
«Դասադուլը կամ գործադուլը պետք է ուղղված լինի աշխատնքային կամ ուսման պայմանների բարելավմանը և այլն: Բայց ձեր պահանջը քաղաքական է, ուղղված է ԱԺ-ին»,-ասաց ռեկտորը:
Ակցիայի մասնակից ԵՊՀ ուսանողական ծրագրերի համակարգող Էդվարդ Գալստյանն իր հերթին հայտնեց, թե ուսանողները ցանկանում են, որ Հայոց լեզվին և Պատմությանը վերաբերող սպասվելիք փոփոխությունների հարցերը քննարկվեն ԵՊՀ գիտխորհրդում, որպեսզի դժգոհ երիտասարդները իմանան բուհի դիրքորոշումը. «Պարոն Գևորգյան, ակցիան որևէ մեկի դեմ չէ: Այն նպատակ է հետապնդում թեման համասլարանում քննարկման առարկա դարձնել: Մեր պահանջը քաղաքական չէ ու ԱԺ-ին ուղղված չէ: Մենք նույնիսկ «պահանջ» բառը չենք օգտագործում, մենք ուղղակի խնդրում ենք ԵՊՀ-ում քննարկել հարցը»:
Ռեկտորի պաշտոնակատար Գեղամ Գևորգյանը հայտարարեց, որ օրենքն ընդունում կամ չի ընդունում ԱԺ-ն. «Երբ գիտխորհրդում քննարկվում էր օրենքի նախագիծն ու խոսվեց երկու առարկաների մասին, եղավ հարցը չքննարկելու առաջարկ, քանի որ ընդհանուր հայտարարի գալ չէր լինի: Դրանից հետո բոլորին հնարավորություն է տրվել արտահայտել սեփական կարծիքը»:
Ռեկտորի խոսքերով, ամեն օր ուսանողների խմբերը կարող են ինչ-որ հարցով գիտխորհրդի նիստ հրավիրել պահանջել, սակայն այդպես չի լինի:
