Եղանակային վատ պայմանները չեն խանգարել որդեկորույս մայրերին կրկին հավաքվել կառավարության մոտ ու բողոքի ակցիա անել:
Լրագրողների հետ զրույցում Մարագարիտա Խաչատրյանը հայտնեց, որ դիմել էին կառավարությանը, որպեսզի կիրառվեն չափորոշիչներ. «Որ չափորոշիչով Մարտի 1-ի զոհերի համար տրամադրել են 30 միլիոն դրամ, նույն չափորոշիչը թող կիրառեն զոհվածների մայրերի մասով: Արդեն անցել է 4 ամիս: Ես առաջարկել եմ, որ պատշաճ թոշակ լինի միակ կերակրողից զրկված մայրերի համար, որպեսզի նրանք կարողանան ապահովել իրենց ապրելակերպը։ Անցել է բավականին ժամանակ: Ասում են, որ վարչապետն այստեղ չէ, բայց մենք վարչապետի համար չենք եկել»:
Խաչատրյանը հիշեցրեց, որ նույն այսօրվա կառավարությունը քննարկեց ու նախագիծ ընդունեց՝ 30 միլիոն տրամադրելով Մարտի 1-ի զոհերին, սակայն անտեսում են զոհվածների մայրերին. «Մեր պահանջը տեղին է: Թող զոհվածների ընտանիքների նկատմամբ կիրառեն նույն չափորոշիչները, ինչը Մարտի 1-ի դեպքում»:
Տիկին Խաչատրյանը հայտարարեց, որ մինչև վերջ գնալու են, որպեսզի իրենց հարցին լուծում տրվի. «Շատ վիրավորական է, որ երկիրն ու կառավարությունն անտեսում է: Սիրելի մայրեր, քույրեր, ուշիուշով հետամուտ եղեք ձեր բալեքին, որովհետև կորստից հետո ոչ մեկը մեզ տեր չի կանգնում: Մեր տղերքին կորցնելուց հետո մենք անտեսված ենք կառավարության ու իշխանության կողմից»:
