Հունվարի 12-ին Գյումրիում կատարված սպանության վերաբերյալ բազմաթիվ վարկածներ հնչեցին, որոնցից մեկը Ադրբեջանի հնարավոր մասնակցությունն է:
Քաղաքագետ Սերգեյ Շաքարյանցի խոսքով` Ադրբեջանի մասին խոսք անգամ չի կարող լինել.«Դրա հետքը չեմ տեսնում, իսկ, ընդհանրապես, ճիշտը նախաքննության ավարտին սպասելն է, որից հետո պարզ կլինի»:
Քաղաքագետ Հրանտ Մելիք-Շահնազարյանի կարծիքով` եթե հանցագործին ձերբակալեին Հայաստանի իրավապահ մարմինները, ապա ամեն ինչ այլ ընթացք կստանար. «Ռուսաստանն ունի իր սահմանադրությունն ու օրենսդրությունը, և ըստ այդ սահմանադրության` իրավունք չունի` իր քաղաքացիներին հանձնելու տեղի քրեադատավարությանը: Իրավաբանորեն չգիտեմ` որ օրենքը որին է համապատասխանում կամ հակասում, բայց փաստն այն է , որ հանցագործին ձերբակալել են ոչ մեր իրավապահները, այլ ռուսական կողմը :Կարծում եմ` իրենց օրեքների և սահմանադրության հետ կապված փոխհամաձայնության կգան հայկական կողմի հետ և հետաքննություն կիրականացնեն, և ամեն ինչ պարզ կլինի»,-ասաց քաղաքագետը:
Հարցին, թե հնարավոր է , որ այս սպանության մեջ Ադրբեջանի «մատն է խառը», Շահնազարյանը պատասխանեց, որ չի պատրաստվում գուշակություններ անել. «Կլինի պաշտոնական տեղեկատվություն, նոր կքննարկենք` հնարավո՞ր է նման բան, թե ոչ»,-ասաց նա:
Ըստ քաղաքական վերլուծաբան Ստեփան Սաֆարյան` դեպքի հետ կապված պետք է հասկանալ շարժառիթները` ո՞ւմ հետ է դա արվել և ինչպե՞ս է արվել . « Եվ իհարկե, հրամանատարությունը պատասխանատվության իր բաժինն ունի. զինծառայողին հաջողվել է դուրս գալ զորամասից և քաղաքի մի ծայրից հասնել մյուս ծայրը, սպանդ իրականացնել այդ ընտանիքի նկատմամբ : Մի բան ակնհայտ է` եթե մեր իրավապահները նախկինում ռուսական ռազմաբազայի զինվորների արաքների համար պատիժ իրականացրած լինեին և կոծկումներ չլինեին, ապա այս դեպքն էլ , հույս կունենայինք, որ շուտ կբացահայտվեր: Հիմա այն, ինչ պետք է անել` բացահայտելն ու պատժելն է»,- մեկնաբանեց Սաֆարյանը:
Մարդասպանն իր ցուցմունքում նշել էր, որ ցանկացել է զբոսնել քաղաքում և ջուր խմելու նպատակով է այցելել Ավետիսյանների տուն, որից հետո էլ տեղի է ունեցել դեպքը:
Ցուցմունքի առնչությամբ պարոն Սաֆարյանը նկատեց, որ հանցագործը ձերբակալվելուց հետո ժամանակ է անցկացրել ռուսական սահմանապահների մոտ, ինչն էլ պատճառ է հանդիսացել ցուցմուքները փոխհամաձայնեցնելու համար:
Հասմիկ Մովսիսյան