Ներկայիս Հայաստանի իշխանությունն հասարակության շրջանում ունի զրոյական վստահություն և չկա որևէ ոլորտ, որը ձախողված չլինի, իսկ դրանց համար պատասխանատուներն այսօր բարձրաստիճան պաշտոններ են զբաղեցնում: Այս մասին այսօր ԲՀԿ առաջնորդ Գագիկ Ծառուկյանի նախաձեռնած «Ոչ իշխանական քաղաքական և հասարակական ուժերի խորհրդաժողով»-ին հայտարարեց ՀՀ ԱԺ ԲՀԿ խմբակցության պատգամավոր Նաիրա Զոհրաբյանը:
«Երկրի տնտեսությունը ձախողողն այսօր դեսպան է նշանակվել և ֆեյսբուքյան էջերում հետևելով Քիմ Քարդաշյանի օրինակին՝ ֆոտոսեսիաներ է կազմակերպում ԱՄՆ նախագահ Օբամայի հետ: Արտագաղթ տերմինն այլևս չի կարող բնորոշել այն իրավիճակը, որը կա երկրում, այն ավելի լուրջ վտանգներ է ներկայացնում»,- ասաց Ն. Զոհրաբյանը:
Ըստ նրա՝ պետք է բոլոր խնդիրների մասին խոսել բաց ու հրապարակային: Միայն մտքերի փոխանակության ադյունքում կարող է ծնվել ճշմարտությունը:
Պատգամավորն անդրադարձավ նախորդ տարեվերջին սկսված դրամ-դոլար տատանումներին՝ դրանք կոչելով ավանտյուրաներ: Նա ավանտյուրա է համարում նաև Սահամանադրական փոփոխությունների գաղափարը:
«Մեր երկրի այսօրվա վիճակի պատասխանատուն և մեղավորը Սահմանադրությունը չէ: Եթե իշխանությունները հարգեին այն, այսօր կապրեինք այլ երկրում: Սահմանադրական փոփոխոթյուններ ավանտյուրայի անվան տակ իշանությունները փորձում են ևս տասը տարի երկարաձգել իրենց իշխանությունը»,- ասաց Ն. Զոհրաբյանը:
Նա ընդգծեց, որ այս խորհրդաժողովի նպատակն է կազմել երկրի տնտեսական և քաղաքական իրավիճակին նպաստող ճանապարհային քարտեզ՝ առանց բախումների և արյունահեղության:
