Նախօրեին Գյումրիի ոստիկանների կողմից գործարար Գարիկ Ուզունյանին ձերբակալելը քաղաքական հետապնդում է, ոմանք ոստիկանության միջոցով փորձում են Գյումրիի ընդդիմադիրների բերանը փակել: Այս մասին Analitik.am-ի հետ զրույցում ասաց Գարիկ Ուզունյանի ընկերը՝ իրավապաշտպան Կարապետ Պողոսյանը:
Ներկայացնելով տեղի ունեցածը՝ Պողոսյանը նշեց, որ դեկտեմբերի 8-ի երեկոյան կենցաղային վեճ է եղել, որի մասնակիցները միմյանց հետ ծանոթ մարդիկ են, ուղղակի թյուրըմբռնում է եղել: Իրավիճակից փորձել է օգտվել իմքայլական պատգամավոր Կարեն Սարուխանյանը․ «Մենք Երևանում էինք, զանգեցին ասացին, որ նա ֆեյսբուքում էշ-էշ դուրս է տվել։ Ի դեպ, այդ մարդու մականունը եզո է:
Հետո ոստիկանությունից զանգել են ու ասել՝ եկեք ներակայացեք։ Երբ վերադառնում էինք Գյումրի, հենց Երևանյան խճուղիում մեքենան կանգնեցրին ու ստուգեցին»,-ասաց նա և հավելեց, որ իրենք որևէ տեղ փախչելու մտադրություն չեն ունեցել՝ գնում էին Ոստիկանություն, իսկ ստուգող ոստիկաններն անգամ համազգեստով չեն եղել և որևէ վկայական ցույց չեն տվել:
«Այնպես էր, որ մտածում էինք ավազակային հարձակում է: Ստուգում էին․․․ հետո Գարիկին, բառիս բուն իմաստով, մեքենայից գողացան-տարան»,-ասաց մեր զրուցակիցը՝ հավելելով, որ ոստիկանները պնդել են, թե իրենք չեն ներկայացել բաժին, որպեսզի ձերբակալման համար հիմքեր ունենան:
Պողոսյանը նաև նշեց, որ նույն գիշերը, ժամը 12-ից 15 պակաս հաղորդվել է, թե Գարիկ Ուզունյանին ձերբակալել են, սակայն նրան ձերբակալել էին դրանից 15 րոպե հետո։ Նա նկատեց նաև, որ ոստիկանությունում մինչ այդ է քրեական գործ սարքվել․ կարճ ասած՝ քաղաքական որոշում է եղել:
Իսկ թե ինչի հիման վրա էին ոստիկանները ձերբակալել Գարիկ Ուզունյանին, Պողոսյանն ասաց՝ օպերատիվ տվյալների, որը, իր համոզմամբ, պատգամավորի գրառումն է:
Նա նաև նշեց, որ միջադեպը ոստիկանությունը որակել է որպես խուլիգանություն, որպեզի կարողանան Գարիկ Ուզունյանին ձերբակալել: Իրավապաշտպանը շեշտեց, որ ձերբակալման պահին ոչ բողոք է եղել, ոչ ցուցմունք, իսկ Կարեն Սարուխանյանի գրառումից հստակ պատվերի հոտ էր գալիս:
«Սարուխանյան կոչվածն ընդհանրապես չգիտի, թե ինչ է պետությունը, պետության կառուցվածքն իր խելքի բանը չի, չի էլ կարող լինել»,-համոզված է իրավապաշտպանը։ Նրա բացատրելով այդ ամենը կապում են Ռոբերտ Քոչարյանի կողմից երկրաշարժի զոհերի հուշահամալիրին պսակ դնելու հետ։ Սակայն հայտնի է, որ գործող և նախկին նախագահներն ունեն գրասենյակներ, որոնք զբաղվում են այդ հարցերով, կան հստակ արարողակարգեր:
«Ռ. Քոչարյանի գրասենյակը վերջին 11 տարին դեկտեմբերի 7-ին, առավոտյան ժամը 07:30-ից մինչև ժամը 8-ը դնում է ծաղկեպսակը՝ համաձայն արարողակարգի»,-ասաց նա և հավելեց, որ Սարուխանյանը փորձել է ինչ-որ ձևով երկրորդ նախագահի նկատմամբ բաներ ասել՝ ընդամենը:
«Այսօր շատ-շատ անարժաններ, դասալիքներ, իրենց ոչնչությունն ինչ-որ ձևով դրսևորելու համար սկսում են կայացած, հերոս, կռված մարդկանց վարկաբեկել: Ես ու Գարիկը հասկանում ենք, որ նման մարդկանց հետ չարժի գլուխ դնել»,-ասաց նա:
Կարապետը նշեց, որ Սարուխանյանին անգամ ՔՊ-ականները են ճենճ ասում և դիմեց նրան. «Այ, ճենճ, դու էդքան չկաս, որ քեզ ուզենանք տեսնել, դու քեզանից ոչինչ չես ներկայացնում»:
Նա նաև հերքեց, որ որևէ կերպ կապված է Ռոբերտ Քոչարյանի անունից պսակ տանել-դնելու հետ. «Ես Ռոբերտ Քոչարյանին կարող եմ շատ սիրել, հարգել, բայց նրա անունից չեմ կարող պսակ դնել»:
Իսկ թե ինչու են ընկել իրենց հետևից, իրավապաշտպանը բացատրություն ունի. «Մենք ընդդիմադիր ենք, բոլորի ճակատին ասում ենք, թե ինչ են ներկայացնում իրենցից»:
Պողոսյանը նշեց նաև՝ երբ Նիկոլը գալիս է Գյումրի, մարդիկ հենց երեսին են ասում այն ամենի մասին, ինչ մտածում են. «Իսկ նման քայլերով փորձում են ոմանց կոտրել: Գիտակցող մարդիկ շատ են ու հասկացել են, որ իրենք խաբված են: Ներկա իշխանությունները կապիկություններով արդեն չեն կարողանում իշխանություն պահել, փորձում են վախի մթնոլորտը հնարավորինս խորացնել՝ օրինակ՝ գործ կարելով»,-ասաց նա:
Գոհար Ստեփանյան
