Հայաստանի լրատվությանը, ակտիվ քաղաքական գործիչներին կխնդրեմ ավելի շատ լուսաբանել, ոչ թե միջամտել քաղաքական պայքարին: Այս մասին լրագրողների հետ հանդիպմանը հայտարարեց Արցախի նախկին վարչապետ Արայիկ Հարությունյանը, ով պայքարելու է Արցախի նախագահի պաշտոնի համար:
«Ցավոք, ես այսօր միջամտությունը տեսնում եմ: Լրատվությունը պետք է ավելի շատ օգնի Արցախում միասնությունը պահելուն, բայց ես տեսնում եմ հայաստանյան լրատվամիջոցներում պատվիրված հոդվածներ, որոնք միտված են պառակտելու Արցախը: Ուզում եմ կոչս տեղ հասնի բոլորին, քանի որ ամեն նման ստոր, վարկաբեկող, անհիմն հոդված Արցախում խնդիր է առաջացանում: Եթե խոսում ենք դավադրության մասին, ասեմ՝ այն բոլոր լրատվությունները, որոնք նման գործունեություն են իրականացնում, գլխավոր դավադիր քայլերը հենց իրենք են կատարում»,-ասաց նա:
Հարությունյանը նշեց, որ կարող է հրապարակել, թե ում մասին է խոսքը. «Եթե խնդիր կա, հարցը բարձրացրեք ու պարզաբանում ստացեք: Ամոթ է, պետք չէ Արցախը ներքաշել Հայաստանի ներքաղաքական կյանքի և ընդհանուր քաղաքական պայքարի մեջ՝ փորձելով խանգարել Արցախի առօրյային»:
Լրագրողների հարցին, թե կարող է արդյո՞ք 1-2 անուն հրապարակել, Հարությունյանն ասաց, որ շուտով կանի դա. «Խոստանում եմ այդ բոլոր լրատվությունների անունները ընտրությունների ժամանակ, կամ դրանցից հետո հրապարակել՝ դա անելով ամոթանքով»:
Լրագրողների հետ բանավեժից հետո, թե ինչպես կարելի է լրագրողներին մեղադրել դավադրության մեջ, պետք է անուններ հնչեցնել, Հարությունյանը նշեց, որ խոսքը վերաբերում է ոչ թե լրագրողներին, այլ լրատվական կայքերին, որոնք զբաղված են այդ գործունեությամբ:
