Փաստաբան Նորայր Նորիկյանը ֆեյսբուքյան իր էջում գրում է.
«Միացյալ նահանգների Սենատը հաստատեց Հայոց ցեղասպանության օրինագիծը։
Տպավորիչ էր, որ սենատոր Ռոբերտ Մենենդեզը խոսելու ընթացքում հուզվեց:
Սա պատմական իրադարձություն է և շատ կարևոր ուղերձ ողջ աշխարհին:
Առհասարակ մեր պատմությունը նախևառաջ մեզ համար պետք է դաս լինի, և մենք պետք է գիտակցենք, որ այլևս չե՛նք լացելու, չե՛նք մուրալու և մազապուրծ չե՛նք լինելու:
Պաշտպանելու ենք ինքներս մեզ, մե՛ր հայրենիքը, մե՛ր պետականությունը և մե՛ր արժանապատվությունը...
Իմ կարծիքով, մեր ասելիքը սա պետք է լինի միջազգային հանրությանը, Թուրքիային և նրա բոլոր դաշնակիցներին....
Նշված վարքագծի դրսևորումը, համոզված եմ, լավագույն հարգանքի տուրքը կլինի հայոց ցեղասպանության անմեղ զոհերի հիշատակին և յուրաքանչյուրիս մոտ կստեղծի վճռականություն՝ պատմական արդարությունը բոլոր առումներով երբևէ վերականգնելու համար»: