Վերաքննիչ քրեական դատարանում շարունակվում է ՀՀ երկրորդ նախագահ Ռոբերտ Քոչարյանի պաշտպանների բողոքի քննությունը: Երկրորդ նախագահի պաշտպանները պահանջում են գրավի դիմաց ազատ արձակել վերջինիս:
Նիստի ընթացքում ելույթ ունեցավ նաև Քոչարյանը, ով նախ ասաց, որ հնարավոր է շեղվի հարցի քննությունից և նշեց, որ ելույթ չէր ունենա, եթե դատական նիստում իրեն չհամարեին սպառնալիք պետականության համար:
«Դատական նիստի ժամանակ քաղաքացին ինձ մեղադրում է երկու տարի առաջ իր կնոջ մահվան մեջ, ով մահացել է ինֆարկտից: Ես ի՞նչ կապ կարող եմ ունենալ դրա հետ: Դրա համար համբերատար լսեք ինձ»,-ասաց Քոչարյանը:
Երկրորդ նախագահի խոսքերով, երբ ինքը դարձել է Հայաստանի նախագահ, երկիրը միջազգային կազմակերպություններից կողմից դասվում էր աղքատ երկրների ցանկում. «Իսկ իմ նախագահության ժամանակ երկիրը դարձել է միջին եկամուտներ ունեցող երկիր և այդպես է մինչ օրս: Եթե այս արդյունքներ ունեցող մարդը համարվում է վտանգ պետականության համար, էլ ինչ ասեմ…»,-ասաց Քոչարյանը:
Երկրորդ նախագահի ելույթից հետո ծափեր հնչեցին:
Դատավորը խնդրեց դատական նիստը խանգարողներին հեռացնել նիստերի դահլիճից:
