«Հրապարակ» թերթը գրում է. «Նախորդ ամիս, երբ հրապարակվեց Երևանի քաղաքապետարանի պարգևավճարների ցանկը, և հերթական անգամ աղմուկ բարձրացավ, Երևանի «կարգին» քաղաքապետը հայտարարեց, որ տվյալ աշխատակիցները դիմում են գրել, որպեսզի իրենց եռամսյակային պարգևավճարները բաժանվեն ամիսների վրա, և այսուհետ նրանք դա կստանան ամեն ամիս:
Սակայն պարզվում է՝ այս ամիս էլ են նույն աշխատակիցները պարգևատրվել և´ պատկառելի չափերով: Օրինակ, Երևանի քաղաքապետի տեղակալները, ովքեր անցած ամիս պարգևատրվել էին 420 հազար դրամով, այս ամիս պարգևատրվել են 840 հազարով:
Քաղաքապետարանի աշխատակազմի քարտուղար Վահե Խաչատրյանը, գլխավոր ճարտարապետը, քաղաքապետի երկու խորհրդականները, մամուլի քարտուղարը, որի հիմնական գործառույթը մամուլի աշխատանքը խոչընդոտելն է, տեղեկատվության վարչության պետը, մի շարք այլ վարչությունների պետեր ևս պարգևատրվել են 840 հազարական դրամով, բաժնի պետերը՝ 600 հազար դրամի կարգի և այլն:
Հիմա հարց է առաջանում, թե ինչու է Հայկ Մարությանն այսքան միլիոններ ծախսում յուրայիններին պարգևավճարներ տրամադրելու վրա՝ քաղաքի բյուջեն հո իր անձնական բյուջեն չէ՞, որ 56 միլիոն դրամ միայն դեկտեմբերին պարգևավճար տաս քո մտերիմներին»:
Մանրամասն՝ թերթի այսօրվա համարում
