Գործ չտալու մասին խոսողներն ամենամեծ գործ տվողներն են՝ այն պայմանով, որ դա նրանք անում են իրենց անձնական կոնկրետ խնդիրները լուծելու համար: Այսօր կառավարության նիստում հայտարարեց ՀՀ վարչապետ Նիկոլ Փաշինյանը:
Փաշինյանն առաջարկում է, որ ամեն մարդ իր ներուժն օգտագործի հանրային, ոչ թե իր նեղ անձնական շահի համար. «Մենք պետք է որպես մի երկիր, հանրություն, ընտանիք մեր ընդհանուր գործերը կարգավորենք»:
Այս համատեքստում Փաշինյանը խոսեց նաև «Հայաստանն իմ օջախն է, ժողովուրդը՝ իմ ընտանիքը» կարգախոսի մեկնաբանությունների մասին. «Մեկնաբանություններ եղան, թե կառավարության ղեկավարը կստանա «ժողովրդի հոր» կարգավիճակ: Ես ուզում եմ հիշեցնել, որ ընտանիքում միայն հայրեր գոյություն չունեն, կան զավակներ, եղբայրներ, քույրեր: Մենք ասել ենք, որ կառավարության և ղեկավարի գործառույթը պատկերացնում ենք բացառապես ՀՀ քաղաքացիներին ծառայության ձևով: Մենք ժողովրդի հայր, կամ չգիտեմ ինչ լինելու հավակնություն չունենք, քանի որ ժողովուրդը մեր գործատուն է: Իսկ եթե «հայր» լինելու անհրաժեշտություն կա, ապա «հայրն ու մայրը» ժողովուրդն է, իսկ մենք սպասավորներ ենք»:
