Բազելում՝ ԵԱՀԿ արտգործնախարարների խորհրդի աշխատանքներին մասնակցող Հայաստանի արտգործնախարար Էդվարդ Նալբանդյանը մի շարք երկկողմ հանդիպումներ է ունեցել: Դեկտեմբերի 4-ի առավոտյան Էդվարդ Նալբանդյանը ներկա է գտնվել Հավաքական անվտանգության պայմանագրի կազմակերպության անդամ երկրների արտգործնախարարների հանդիպմանը, որի ընթացքում քննարկվել են ԵԱՀԿ նախարարական խորհրդի 21-րդ նստաշրջանի օրակարգը, ՀԱՊԿ անդամ երկրների արտաքին քաղաքական համադրմանն առնչվող հարցեր։ Հանդիպմանը քննարկվել են դեկտեմբերի վերջին Մոսկվայում կայանալիք Հավաքական անվտանգության խորհրդի նախապատրաստական աշխատանքները:
Էդվարդ Նալբանդյանի և Ֆինլանդիայի արտգործնախարար Էրկկի Տուոմիոյայի հետ հանդիպման ընթացքում մտքեր են փոխանակվել Հայաստան-Եվրոպական միություն հարաբերությունների վերաբերյալ։ Ֆինլանդիայի արտգործնախարարի խնդրանքով նախարար Նալբանդյանը ներկայացրել է Հայաստանի մոտեցումները` տարածաշրջանային խնդիրների և դրանց լուծման ուղիների վերաբերյալ:
Նախարար Նալբանդյանի և Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Հերբերտ Զալբերի հետ հանդիպման ժամանակ քննարկվել են ղարաբաղյան հիմնախնդրի կարգավորման գործընթացի վերջին զարգացումները։ Նախարար Նալբանդյանը ԵՄ հատուկ ներկայացուցչին տեղեկացրել է Ադրբեջանի զինուժի կողմից Լեռնային Ղարաբաղի պաշտպանության բանակի` ուսումնավարժական թռիչք իրականացնող ուղղաթիռի խոցման հետևանքով ստեղծված իրավիճակը:
Հայաստանի արտաքին քաղաքական գերատեսչության ղեկավարի և Վրաստանի արտգործնախարար Թամար Բերուչաշվիլիի հանդիպմանը Էդվարդ Նալբանդյանը, շնորհավորելով նրան նշանակման կապակցությամբ, վստահություն է հայտնել, որ երկու երկրները կշարունակեն առավել ամրապնդել և խորացնել բարիդրացիական հարաբերությունները։ Զրուցակիցները քննարկել ենն բարձրաստիճան փոխայցելությունների առաջիկա ժամանակացույցը, կարևորվել է ԱԳՆ-ների միջև պարբերական խորհրդատվությունների անցկացումը։ Անդրադարձ է արվել մի շարք տարածաշրջանային խնդիրների:
Հայաստանի և Էստոնիայի արտաքին քաղաքական գերատեսչությունների ղեկավարների` Էդվարդ Նալբանդյանի և Քեյթ Պենտուս-Ռոզիմաննուսի հանդիպման ժամանակ գոհունակություն է հայտնվել երկկողմ հարաբերությունների բարձր մակարդակի կապակցությամբ։ Քննարկվել են Հայաստան-Եվրոպական միություն հարաբերությունները, միջազգային կազմակերպությունների շրջանակներում հայ-էստոնական փոխգործակցությունը։ Նախարարներն անդրադարձել են կրթական բնագավառում համագործակցությանը։ Պայմանավորվածություն է ձեռք բերվել առաջիկայում փոխադարձ այցելություններ իրականացնելու վերաբերյալ:
Ռուսաստանի արտգործնախարար Սերգեյ Լավրովի հետ նախարար Նալբանդյանը քննարկել է երկու երկրների ղեկավարների մակարդակով ձեռք բերված պայմանավորվածությունների կատարման ընթացքը, հայ-ռուսական հարաբերությունների տարբեր բնագավառներին վերաբերող հարցերի լայն շրջանակ։ Անդրադարձ է արվել տարածաշրջանային խնդիրների կարգավորման ուղղությամբ գործադրվող ջանքերին:
Նախարարները գոհունակություն են հայտնել դեկտեմբերի 4-ին Եվրասիական միության հիմնադրման մասին փաստաթղթին Հայաստանի միացման վերաբերյալ պայմանագրի` ՀՀ Ազգային ժողովի կողմից վավերացման կապակցությամբ:
Հայաստանի արտաքին քաղաքական գերատեսչության ղեկավարը իր ռուսաստանցի գործընկերոջն է ներկայացրել Ադրբեջանի զինուժի կողմից Լեռնային Ղարաբաղի պաշտպանության բանակի` ուսումնավարժական թռիչք իրականացնող ուղղաթիռի խոցման հետևանքով ստեղծված լարված իրավիճակը:
Էդվարդ Նալբանդյանի և Մալթայի արտգործնախարար Ջորջ Վելլայի հանդիպմանը անդրադարձ է արվել երկկողմ հարաբերությունները ձևավորելու նպատակով ձեռնարկվելիք քայլերին։ Այս առումով կարևորվել է համատեղության կարգով Վալետայում Հայաստանի դեսպանի հավատարմագրումը:
Նախարարները քննարկել են միջազգային կազմակերպություններում փոխգործակցության սերտացման, իրավապայմանագրային դաշտի կատարելագործման, գործարար կապերի, մշակութային փոխանակումների ակտիվացման ուղիները։ Էդվարդ Նալբանդյանն ու Ջորջ Վելլան մանրամասն մտքեր են փոխանակել Հայաստան-Եվրոպական միություն համագործակցության շուրջ:
