Այսօր մամուլի ասուլիսին ՀՀՇ անդամ Հովհաննես Իգիթյանն, անդրադառնալով վերջին շրջանում ազատամարտիկներին ծեծի ենթարկելու փաստին, ասաց, որ եթե ազատամարտիկները տեսնեն, որ իշխանությունները չեն լուծում այդ խնդիրները, կարող են բարկանալ և այդ խնդիրները լուծել իրենց իմացած ձևով, ինչը վտանգավոր է:
Նա նկատեց, որ այսօր խորհրդարանում ևս օգտագործվում է փողոցային բառապաշար: Ինչ վերաբերում է ՀԱԿ խմբակցության քարտուղար Արամ Մանուկյանին ծեծի ենթարկելուն, ապա Հովհաննես Իգիթյանը նրան առողջություն մաղթեց և նշեց.«Քո քվեարկած ԵՏՄ-ն սա է Արամ Մանուկյան, մի վազեք Եվրոպական միության դեսպանների մոտ, որովհետև եթե դուք կողմ եք քվարկում ԵՏՄ-ին ու ժողովրդին էլ ասում եք, թե սա անխուսափելի է, ապա իմացեք՝ սա է լինելու: Գնացեք Պուտինին խնդրեք, որ զանգեն այս իշխանություններին, որ այսպիսի բաներ չարվեն»:
ԱԺ «Հանրապետական» խմբակցության անդամ Մանվել Բադեյանը համաձայնեց, որ ցանկացած բռնություն ցանկացած բռնարարք դատապարտելի է, առավել ևս, երբ այն տեղի է ունենում այս երկրի առաջ որոշակի վաստակ ունեցող մարդկանց նկատմամբ: «Այստեղ ամենակարևորն այն է, որ մենք կարողանանք հասկանալ դրդապատճառները և պիտակներ չկպցնենք ինչ-որ ուժերի կամ մարդկանց վրա՝ կախված նրանից, թե քեզ այս պահին ինչ է պետք ասել: Պետք է արհեստավարժ հետաքննություն անցկացնել և տեսնել, թե յուրաքանչյուր դեպքում ինչն է եղել դրդապատճառը, փոխկապակցված են այս ամենը և մի կենտրոնից են ուղղորդված»,- ասաց նա և նշեց, որ ցանկացած այլ ենթադրություն սպեկուլյատիվ բնույթ է կրում:
Ինչ վերաբերում է այս համատեքստում ԵՏՄ անդամակցությանը՝ Մանվել Բադեյանն ասաց. «Վաղը կարող է եղանակը վատը լինել, և կարելի է ասել ԵՏՄ մտանք, դրա համար է եղանակը վատ»:
