Վրաստանի գլխավոր դատախազությունը «մոտ ժամանակներս» դատարան կփոխանցի գործերը, որոնցով մեղադրյալ է անցնում երկրի նախկին նախագահ Միխեիլ Սաակաշվիլին: Այդ մասին հայտարարել է պետության գլխավոր դատախազ Գեորգի Բադաշվիլին «Կվիրիս պալիտրա» թերթում հրապարակված հարցազրույցում:
Նա նշել է, որ ամռանը Սաակաշվիլիին «չորս գործով մեղադրանքներ են ներկայացվել»:
«Պայմանավորված այն հանգամանքով, որ Սաակաշվիլին հրաժարվել է քննության հետ համագործակցությունից և չի ներկայացել քննչական մարմիններ, նրան հեռակա կարգով մեղադրանքներ են ներկայացվել, իսկ որպես խափանման միջոց՝ ընտրվել է կալանքը»,- նշել է նա:
Բադաշվիլին հիշեցրել է, որ օգոստոսի 14-ին նախկին նախագահի նկատմամբ «Վրաստանում հայտարարվել է հետախուզում, և զուգահեռաբար Գլխավոր դատախազությունը դիմել է Ինտերպոլի գլխավոր քարտուղարություն Սաակաշվիլիի նկատմամբ միջազգային հետախուզում հայտարարելու մասին խնդրանքով»:
Մոտ երեք շաբաթ առաջ Վրաստանի գլխավոր դատախազության ներկայացուցիչը տեղեկացրել է այն մասին, որ «Ինտերպոլը դեռ որոշում չի կայացրել» նախկին նախագահի նկատմամբ հետախուզում հայտարարելու հարցով:
