Հայաստանի Հանրապետության կառավարությունը հաստատեց «Շահութահարկի մասին» ՀՀ օրենքում լրացումներ և փոփոխություն կատարելու մասին» ՀՀ օրենքի նախագիծը, որը խրախուսում է արտահանումը մեր երկրից: Նախագծով նախատեսվում է ՀՀ ռեզիդենտ հարկ վճարողի (բացառությամբ հանքարդյունահանող և (կամ) հանքային հումքի վերամշակում իրականացնող ռեզիդենտ հարկ վճարողների) համար շահութահարկի գումարը հարկվող շահույթի նկատմամբ հաշվարկել 2 տոկոս դրույքաչափով, եթե հարկ վճարողը կունենա ՀՀ կառավարության հավանությանն արժանացած արտահանման ծրագիր և հաշվետու տարվա ընթացքում ՀՀ տարածքից «Արտահանում» մաքսային ընթացակարգով կարտահանի առնվազն 50 մլրդ դրամի մաքսային արժեքով ապրանքներ:
Բացի այդ, հարկ վճարողը պետք է հաշվետու տարվա ընթացքում ՀՀ ռեզիդենտ բանկերում բացված բանկային հաշիվներին արտահանման ծրագրին վերաբերող գործունեությունից մուտքագրի առնվազն 50 մլրդ դրամին համարժեք արտարժույթ և հաշվետու տարվա ընթացքում չունենա ՀՀ տարածքում ապրանքների մատակարարումից, աշխատանքների կատարումից կամ ծառայությունների մատուցումից ստացման ենթակա եկամուտներ:
ՀՀ վարչապետ Հովիկ Աբրահամյանը նշեց, որ սա կառավարության ոչ ստանդարտ քայլերից մեկն է, որով փորձ է արվում խթանել արտահանումը: «Եթե մենք կարողանանք ունենալ նման գործընկերներ, ովքեր տարվա ընթացքում կկարողանան 50 մլրդ դրամի ապրանք արտահանել մեր երկրից, ապա դա կնպաստի նաև նոր աշխատատեղերի ստեղծմանը, դեպի պետբյուջե եկամտհարկի և այլ լրացուցիչ եկամուտների մուտքին: Պետք է փորձենք բոլորս խոսել այս օրենքի նախագծի մասին, որպեսզի մեր հայրենակիցները և բոլոր այն գործարարները, ովքեր կցանկանան կազմակերպել արտահանում, տեղյակ լինեն»,- ասաց վարչապետը՝ ավելացնելով, որ օրենքը չի առնչվում հանքարդյունաբերության ոլորտին:
Գործադիրն օրենքի նախագիծը ճանաչեց հրատապ և ուղարկեց Ազգային ժողով:
