ՀՀ ոստիկանապետ Վլադիմիր Գասպարյանը, ով այսօր Հայոց բանակի կազմավորման 23-րդ տարեդարձի օրը Եռաբլուր պանթեոնում էր, լրագրողների հետ զրույցում ասաց, որ իր կենսագրության կեսը թողել է բանակում:
«Բանակն իմ ընտանիքն է: Ես իմ ամբողջ կենսագրության կեսը թողել եմ բանակում»,-հայտարարեց Վլադիմիր Գասպարյանը՝ շնորհավորելով բոլորին Հայկական բանակի օրվա կապակցությամբ:
Ըստ Վլադիմիր Գասպարյանի՝ Ոստիկանությունը այսօր ունի ուժեղ բանակ, իսկ բանակն էլ՝ ուժեղ ոստիկանություն:
Խոսելով սահմանային միջադեպերի մասին՝ Վլադիմիր Գասպարյանը ասաց. «Ադրբեջանցիներ են, էլի՛»:
Անդրադառնալով Ավետիսյանների սպանության դեպքերին՝ ոստիկանապետը նշեց, որ ՀՀ քննչական կոմիտեն բազում վարկածներ ունի:
«Էդ մեկ-երկուսը ձեր մտքով է անցնում, էնտեղ էնքան վարկածներ են քննարկվում, քննությունն իրենից հենց դա է ենթադրում: Որ տասնյակ վարկածներ են առաջ գալիս, և շատ ժամանակ լինում են վարկածներ, որ աներևակայելի են թվում մարդկային տրամաբանությանը: Նույնիսկ նման վարկածներ են քննարկվում»,- հավատացրեց ՀՀ ոստիկանապետը:
Վլադիմիր Գասպարյանը խորհուրդ տվեց այս գործընթացի ժամանակ չխոսել ենթադրություններով, մասնավորապես, որ ռազմաբազայից 6 զինվոր է փախել, քանի որ դրանով ակամա շատ բաներ խառնվում են:
«Դա նույն պատմությունն է, ինչ սկզբնական ժամանակահատվածում, երբ մենք զբաղված էինք որոնողական աշխատանքներով և հարյուրավոր զանգեր և ենթադրություններ էին լինում, որոնք բացարձակապես ոչնչի հետ կապված չէին»,- ասաց Վլադիմիր Գասպարյանը:
Նա նաև նշեց, որ նախաքննություն իրականացնող մարմինը 15 րոպեն մեկ չպետք է հաշվետու լինի հանրությանը: Առաջարկեց սպասել ժամանակ առ ժամանակ «թույլատրելի պահերով» իրազեկումներին:
Գլխավոր դատախազ Գևորգ Կոստանյանն ասել էր, որ Պերմյակովին բռնելուց հետո պետք է ռուս սահմանապահները հանձնեին իրավապահներին: Վլադիմիր Գասպարյանը նկատեց, որ այդ ամեն ինչը պետք է արվի ապացուցողական բազայի հիման վրա:
«Շատ ճիշտ է արվում, որ Գյումրիի ցուցարարերին կանչում են ոստիկանություն»,-ասաց նա, ապա հավելեց, որ դա արվում է այդ «ջարդերի» կազմակերպիչներին ի հայտ բերելու համար, որոնք, ըստ նրա, պետք է ենթարկվեն քրեական պատասխանատվության:
