Կառավարության կողմից «Շրջանառության հարկի մասին» օրենքի հերթական հետաձգումից հետո այսօր կրկին փոքր ու միջին ձեռնարկությունների ներկայացուցիչները հավաքվել էին Ազգային ժողովի դիմաց՝ նշելով, որ իրենց չի բավարարում օրենքի ժամանակավոր կասեցումը: Իրենք պահանջում են մեկանգամյա և վերջնական լուծում: «Սա ի՞նչ բան է: Իրենց կարճ խելքով մտածում են, որ կարող են մեզ հիմարեցնել: Մենք 5 ամիսը մեկ մեր բանուգործը թողած՝ փողոց դուրս չենք գալու: Մեզ մեկանգամյա և ամբողջական, վերջնական լուծում է պետք, և մենք կհասնենք դրան»,- ասաց առևտրականներից մեկը:
Նրաց կարճ ժամանակով մոտեցան նաև ԱԺ ԲՀԿ խմբակցության պատգամավորներ Միքայել Մելքումյանը և Վահան Բաբայանը: Նրանք ակցիայի մասնակիցներին հիշեցրին, որ իրենց հաջողվել է արտահերթ նիստ հրավիրելու համար անհրաժեշտ ձայներ հավաքել, և այսօր՝ 18:30-ին, իրենց հարցը կքննարկվի արտահերթ նիստում:
ՓՄՁ ներկայացուցիչները կրկին հիշեցրին իրենց պահանջը՝ հայտարարելով, որ իրենք վճռական են տրամադրված և գնալու են մինչև վերջ: Նրանք երեկոյան կրկին կհավաքվեն ԱԺ-ի մոտ՝ հետևելու արտահերթ նիստի ընթացքին:
