Ազգային ժողովի նախագահ Գալուստ Սահակյանն արձագանքեց խորհրդարանում Վերահսկիչ պալատի տարեկան հաշվետվության քննարկմանը ՎՊ նախագահ Իշխան Զաքարյանի բակայությունից դժգոհող պատգամավորների ելույթներին: ԱԺ նախագահն ընդգծեց, որ չէր ցանկանում արձագանքել, սակայն արձագանքում է, քանի որ հասարակությանն ապակողմնորոշվելու փորձեր են արվում: «Ես ցանկանում եմ ասել հետևյալը, որ Ազգային ժողովի կանոնակարգ օրենքը գերակայություն չէ Վերահսկիչ պալատի մասին օրենքի նկատմամբ: Բացեք, վերլուծեք և կտեսնեք, որ ամեն ինչ օրինական է: Ցանկանում եմ անդրադառնալ ելույթներին, թե հակասահմանադրական է այն, որ հաշվետվությունը Վերահսկիչ պալատի նախագահը չի ներկայացնում: Դուք արդեն սկսեցիք ձեզ վրա Սահմանադրական դատարանի ֆունկցիա վերցնել: Անօրինական որևէ բան չկա: Այլ բան է, որ դուք փորձում եք անընդհատ դասեր տալ քաղաքական մեծամասնությանը, առավել ևս Ազգային ժողովի նախագահին: Ազգային ժողովի պատիվը բարձր պահելու հարցում ամենաշահագրգռվածը հենց Ազգային ժողովի նախագահն է»,- նշեց Սահակյանը:
Գալուստ Սահակյանը հիշեցրեց, որ ԱԺ ամբիոնից խոսել են նաև վարչության պետեր, փոխնախարարներ՝ ընդգծելով, որ այնպես էլ չի եղել, որ մշտապես ՎՊ հաշվետվությունը ներկայացրել է միայն ՎՊ նախագահը: «Հիմա ինչ-որ մի բողոքի ալիք եք բարձրացրել, որը ոչինչ չի տալիս: Վերահսկիչ պալատից պահանջում եք արդյունքներ ներկայացնել: Գոնե մեկ անգամ թերթեք և կարդացեք Վերահսկիչ պալատի մասին օրենքը: Վերահսկիչ պալատը ստուգող մարմին չէ: Այն ներկայացրել է փաստերը, դուք էլ կարող եք դատախազություն դիմել, հետո էլ պահանջել արդյունքները: Հիմա Վերահսկիչ պալատի օձիքից բռնել եք ասում եք` արդյունքներ տուր: Բայց այդ մարմինը նման ֆունկցիա չունի»,- նշեց Սահակյանը:
