ԲՀԿ քաղխորհրդի նիստի ավարտից հետո ԲՀԿ կուսակցության մամուլի խոսնակ Տիգրան Ուրիխանյանը լրագրողների հետ զրույցում անդրադարձավ ԲՀԿ առաջնորդ Գագիկ Ծառուկյանի ելույթին, այն որակելով հավասարակշիռ և ծանրակշիռ. « Համապարփակ, խիստ քաղաքական , ծանրակշիռ, առանց, ի հակադրություն այլոց, ջղագրգիռ պոռթկումների, ՀՀ քաղաքացիների հոգսով ու դարդով համեմված ելույթ էր»:
Հարցին, թե Սերժ Սարգսյանի ելույթը որպես մարտահրավե՞ր է ընդունված, Տիգրան Ուրիխանյանը պատասխանեց. « Մարտահրավերը սկսվեց այն ժանամակ, երբ ՀՀ քաղաքացին կորցրեց երկրում ապրելու ցանկությունը, բռնեց երկիրը լքելու ճանապարհը: Ցավում եմ, որ երեկ նախագահը չխոսեց այս մասին, ցավում եմ, որ չխոսվեց արտաքին քաղաքական, տնտեսության խայտառակ վիճակի մասին, այլ անձնական վիրավորանքներ պարունակող ելույթ էր»:
Հարցին, թե վախ չկա՞ հարկային ստուգումների հետ կապված, ԲՀԿ խոսնակը պատասխանեց. «Շատ մեղմ ասած՝ ո՛չ»: