Ինչպես տեղեկացրել ենք, ՀԱԿ պատգամավոր Նիկոլ Փաշինյանն այսօր ԱԺ Պետաիրավական հարցերի մշտական հանձնաժողովում ներկայացրեց «ՀՀ նախագահի պաշտոնը զբաղեցնող Սերժ Սարգսյանին պաշտոնանկ անելու մասին» իր նախագիծը:
Նախագծի վերաբերյալ կարծիք հայտնեց նաև «Ժառանգություն» խմբակցության պատգամավոր Զարուհի Փոստանջյանը:
«Ես Սերժ Սարգսյանին ցանկանում եմ տեսնել «Վարդաշեն» քրեակատարողական հիմնարկում, որտեղ տարիներ անց նրանց կայցելեն ուսանողները և նրանց կհարցնեն, թե ինչու երկիրը նման վատ օրի հասցրեց: Նրանք կհարցնեն, թե ինչու էին այսքան կուրացել այս իշխանությունը կրելով: Ուսանողներն էլ այդ ամենից կօգտվեն և նման բռնապետեր այլևս մեր ժողովուրդը չի ունենա»,- ասաց Փոստանջյանը:
Փոստանջյանին հակադարձեց ՀՀԿ-ական պատգամավոր Վահրամ Մկրտչյանը: Իր ելույթում հիշեցնելով «սուտ մատնություն» հոդվածի մասին և սպառնալով, որ իրենց իրավաբանները կարող են հակադարձ քայլեր նախաձեռնել:
Նախագիծը հանձնաժողովը չընդունեց, հետևաբար՝ այն չի ընդգրկվի ԱԺ առաջիկա լիագումար նիստում: Նախագծին կողմ քվեարկեց միայն Զ. Փոստանջյանը:
