Եգիպտացի գործարարների` 8 հոգուց բաղկացած խումբը Հայաստանում է և համագործակցության եզրեր է փնտրում հայ գործարարների հետ: Կայուն զարգացման եգիպտական խորհրդի նախագահ, գործարար Մոտաս Ռասլանի խոսքով` եգիպտական հեղափոխությունից հետո տեղի իշխանությունները փորձում են բիզնես կապեր ստեղծել այլ պետությունների հետ, այդ թվում` Հայաստանի: «Եգիպտոսի քաղաքական և տնտեսական համակարգը վերջին տարիներին մեծ փոփոխություն կրեց, մենք բռնապետությունից անցում կատարեցինք դեմոկրատական հասարակարգի: Ներկա իշխանությունները խրախուսում են գործարար կապերը այն երկրների հետ, որոնք մեզ համար դեռևս բացահայտված չէին: Դրանցից են հենց Հարավային Կովկասի պետությունները: Մեր պատվիրակությունը կազմում են տուրիզմի, հանքարդյունաբերության, կահույքագործության, չրերի արտադրության և այլ ոլորտների ներկայացուցիչներ, որոնք հայ գործարարների հետ կփորձեն համագործակցության եզրեր գտնել»,- ասաց Ռոսլանը:
Հայ և եգիպտացի գործարարների համար հանդիպումը կազմակերպել էր Հայաստանի առևտրաարդյունաբերական պալատը: Պալատի խորհրդի անդամ, Երևանի Առևտրաարդյունաբերական պալատի նախագահ Անդրանիկ Ալեքսանյանի խոսքով` սա եգիպտացի գործարարների հետ առաջին համագործակցության փորձն է: «Հայկական բիզնեսը պատրաստ է ամեն կերպ համագործակցել եգիպտացի գործարարների հետ: Եգիպտական կողմը հատկապես հետաքրքրված է սննդի արդյունաբերության, տուրիզմի, բարձր տեխնոլոգիաների, հանքարդյունաբերության և այլ ոլորտներով: Քանի որ Հայաստանը պատրաստվում է անդամակցել Մաքսային միությանը, ապա այս համագործակցությունը եգիպացիների համար կարող է դառնալ նաև միջոց` սահուն անցում կատարելու ռուսական շուկա»,-ասաց Ալեքսանյանը:
Հանդիպման ընթացքում Զարգացման հայկական գործակալության տնօրեն Ռոբերտ Հարությունյանը եգիպտացի գործարարներին ներկայացրեց Հայաստանին, տնտեսության կառուցվածքին և բիզնեսին վերաբերող փաստեր:
Եգիպտացի գրծարարների խմբում ընդգրկված էին անշարժ գույքի, զբոսաշրջության և ներդրումային, նավթի և բնական գազի արդյունահանման, ինչպես նաև այլ ոլորտներ ներկայացնող ընկերություններ: