Մոսկվայում այն կարծիքին են, որ Ուկրաինայի, Վրաստանի և Մոլդովայի կողմից Եվրամիության հետ ասոցացման մասին համաձայնագրերի ստորագրումը կարող Է վնասել Ռուսաստանի տնտեսությանը: Այդ մասին ասված Է ՌԴ ԱԳ նախարարության հաղորդագրության մեջ, որը տարածվել Է հունիսի 26-ին:
Կիևը, Թբիլիսին և Քիշնևը պլանավորում են հունիսի 27-ին ստորագրել ասոցացման համաձայնագրեր, որոնցով նախատեսվում Է նրանց մուտքը Եվրամիության ազատ առևտրի գոտի: ՌԴ-ի իշխանությունները քանիցս հայտարարել են, որ այդ դեպքում Ռուսաստանն ստիպված կլինի իր ներքին շուկան պաշտպանել եվրոպական ապրանքների անմաքս հոսքից, մասնավորապես, Ուկրաինայի տարածքով:
«Մենք նախկինի պես այն կարծիքին ենք, որ Ուկրաինայի, Մոլդովայի ու Վրաստանի հետ ասոցացման համաձայնագրերի կնքումը կարող Է վնասել Ռուսաստանի տնտեսությանը՝ կապված մեր հարևանների հետ կոոպերացիոն կապերի խզման և առևտրատնտեսական հարաբերությունների կրճատման հետ»,-ընդգծել Է Ռուսաստանի արտաքին քաղաքական գերատեսչությունը:
ԱԳՆ-ում հիշեցրել են, որ Եվրահանձնաժողովն առաջարկել Է հուլիսի 11-ին նախարարական հանդիպում անցկացնել Ռուսաստան-Եվրամիություն-Ուկրաինա ձևաչափով, ինչին ռուսական կողմը տվել Է իր համաձայնությունը: