Հանրապետության պետական մարմինները գնահատել են պետական ֆինանսների կառավարման համակարգը. հուլիսի 4-ին կայացել է ՀՀ պետական ծախսերի և ֆինանսական հաշվետվողականության` 2013 թվականի գնահատման արդյունքների հրապարակման համաժողովը: Երկրորդ անգամ իրականացվող հաշվետվությունը ներկայացնում է հանրապետության պետական ֆինանսական համակարգի ուժեղ և թույլ կողմերը, 2008թ.-ի գնահատումից հետո արձանագրված առաջընթացը, իրականացված ու սպասվող բարեփոխումները: Հաշվետվությունն արդեն անցել է միջազգայնորեն ընդունված պահանջներին համապատասխանության փորձաքննություն Պետական ծախսերի և ֆինանսական հաշվետվողականության քարտուղարությունում` ստանալով «PEFA CHECK» որակի նշանը: «Գնահատականը վկայում է, որ նպատակաուղղված աշխատանք է իրականացվում պետական ֆինանսների կառավարման համակարգը միջազգային չափանիշներին և հանրային պահանջներին համապատասխանեցնելու ուղղությամբ»,-նկատել է ֆինանսների նախարար Գագիկ Խաչատրյանը:
Ինքնագնահատման եղանակով իրականացված պետական ծախսերի և ֆինանսական հաշվետվողականության գնահատման աշխատանքները կատարվել են ֆինանսների նախարարության համակարգմամբ և Հայաստանում Եվրամիության պատվիրակության ու Գերմանիայի միջազգային համագործակցության ընկերության աջակցությամբ: Գործադիր իշխանության մարմինների հետ մեկտեղ, աշխատանքներում ներգրավված են եղել նաև օրենսդիր մարմնի ֆինանսավարկային և բյուջետային հարցերի մշտական հանձնաժողովն ու Վերահսկիչ պալատը: Գնահատումն իրականացվել է Համաշխարհային բանկի և Արժույթի միջազգային հիմնադրամի` 31 ցուցանիշից բաղկացած համակարգով, որից 11-ով արձանագրվել է բարելավում, իսկ մեծ մասով` բարձր գնահատական:
«Հիմնական բարելավումը գրանցվել է բյուջեի իրատեսականության, թափանցիկության, բյուջեի կատարման և տեղեկատվական տեխնոլոգիաների համակարգերի հզորացման շնորհիվ: Իսկ ցածր գնահատականի արժանացած արտաքին աուդիտի, գնումների և հաշվապահական հաշվառման համակարգերը պետք է լինեն պետական մարմինների և դոնոր կազմակերպությունների ուշադրության կենտրոնում` առաջիկայում բարեփոխումներն առավել նպատակային դարձնելու սկզբունքով»,-նշել է ֆինանսների նախարարի առաջին տեղակալ Պավել Սաֆարյանը: Իր հերթին Հայաստանում Եվրամիության պատվիրակության ղեկավար Դիռկ Լորենցը շեշտել է, որ արդյունավետ և առողջ պետական ֆինանսների կառավարման համակարգը նախադրյալ է ստեղծում` Եվրամիության կողմից Հայաստանին բյուջետային աջակցություն ցուցաբերելու համար:
