ՌԴ նախագահ Վլադիմիր Պուտինը ստորագրել է Հայաստանի հետ երկու երկրների քաղաքացիների գրանցման կարգի փոխադարձ դյուրացման մասին համաձայնագիրը վավերացնելու մասին օրենքը, տեղեկացնում է ТАСС-ը:
Համաձայնագիրը նախատեսում է Հայաստանի տարածքում ժամանակավոր գտնվող ՌԴ քաղաքացիների և Ռուսաստանի տարածքում ժամանակավոր գտնվող Հայաստանի քաղաքացիների ազատում համապատասխան մարմիններում 30 օրվա ընթացքում գրանցվելու պարտականությունից:
Մասնավորապես՝ Հայաստանի քաղաքացիները, որոնք նախկինում պարտավորված էին Ռուսաստանում գտնվելու 30 օրերի ընթացքում հաշվառվել, այժմ ՌԴ-ում կարող են առանց գրանցման մնալ 180-օրյա ժամանակահատվածի համար 90 օր:
Դաշնային միգրացիոն ծառայության ղեկավարի առաջին տեղակալ Եկատերինա Եգորովան ավելի վաղ նշել էր, որ Հայաստանի քաղաքացիներն ԱՊՀ տարածքից Ռուսաստան ներգաղթողների 5 տոկոսն են:
«Մենք այստեղ ներգաղթային որևէ սպառնալիք չենք տեսնում»,- ասել էր նա՝ հավելելով, որ ներգաղթյալների գրանցման նման կարգը ժամանակավորապես արդեն կիրառվում էր Հայաստանից ներգաղթած քաղաքացիների դեպքում, և որևէ բացասական ազդեցություն չի ունեցել ներգաղթի իրավիճակի վրա:
ՌԴ-ի և Հայաստանի կառավարությունների միջև այս համաձայնագիրը կնքվել էր Սոչիում՝ 2014-ի հուլիսի 11-ին:
ՌԴ տարածքում Հայաստանի քաղաքացիների գտնվելու նոր կարգը պայմանավորված է 2015 թվականից Եվրասիական տնտեսական միությանը Հայաստանի անդամակցությամբ: Նմանատիպ համաձայնագրեր արդեն գործում են Բելառուսի ու Ղազախստանի քաղաքացիների համար:
