Թեև այս անգամ տեղական ինքնակառավարման մարմինների ընտրություններին առանձնապես ակտիվ մասնակցություն չէր նկատվում, ոչ էլ թեժ մրցակցություն, բայց միևնույն է, այս ՏԻՄ ընտրությունները ոչ մրցակցային էին:
Այս մասին այսօր լրագրողների հետ քննարկմանը հայտարարեց ընտրություններին դիտորդական առաքելությամբ հանդես եկած «Իրավունքի Եվրոպա միավորում » հասարակական կազմակերպության ներկայացուցիչ Տիգրան Եգորյանը:
«Շատ համայնքներում միայն մեկ թեկնածու էր առաջադրված և նույնիսկ առաջադրվելով` բավական քիչ ձայներով ընտրվում էին: Սա շատ լուրջ պրոբլեմ է, նույնիսկ համազգային»,-նշեց Տիգրան Եգորյանը` հավելելով, որ նույնիսկ այս պայմաններում նկատել են ուրիշի կողմից քվեարկելու կամ բազմակի քվեարկելու դեպքեր:
«Թրանսփարենսի Ինթերնեշնլ» հակակոռուպցիոն կենտրոնի ընտրական ծրագրերի համակարգող Լենա Նազարյանն էլ նկատեց, որ մարտի 15-ին մի շարք համայնքներում անցկացված տեղական ինքնակառավարման մարմինների ընտրություններին դրանց հետևող դիտորդները նկատել են հայաստանյան իրականության համար ավանդական խախտումներ:
«Խախտումների վերաբերյալ կարող եմ ասել, որ նկատել ենք արդեն սովորական և ավանդական դարձած մշտական կուտակումներ, կողմնակի անձանց ներկայություն, ուղղորդումներ, բայց դրանք արդեն շատ սովորական են դառնում»,- ասաց նա։
Մարտի 15 -ին Հայաստանի մի շարք մարզերի 26 համայնքներում անցկացված տեղական ինքնակառավարման մարմինների ընտրությունների արդյունքում ընդամենը մեկ դիմում-բողոք է ներկայացվել ԿԸՀ, հանձնաժողովի որևէ անդամի որևէ հատուկ կարծիք ներկայացված չէ ընտրական փաստաթղթերին։ Այս մասին հայտարարեց ՀՀ Կենտրոնական ընտրական հանձնաժողովի անդամ Նունե Հովհաննիսյանը, ով նույնպես մասնակցում էր քննարկմանը:
«Ունեցել ենք մեկ դիմում և այն հասցեագրվել է թիվ 41 ընտրական հանձնաժողովին, իսկ բողոքը վերաբերել է 41/5, 41/6 տեղամասերին: Բարձրացված է եղել քվեարկության սենյակի կահավորման խնդիրը և վստահված անձին հատկացված տեղի հարցը»,- ասաց Նունե Հովհաննիսյանը` նշելով, որ հանձնաժողովի նախագահն այցելել է նշված տեղամաս և ձեռնարկվել են անհրաժեշտ միջոցառումներ:
Որևէ ՏԸՀ չի ներկայացվել նաև որևէ տեղամասում ընտրությունն անվավեր ճանաչելու մասին պահանջ: Սակայն մեկ` Կոտայքի մարզի Գետարգել համայնքում ընտրությունները ճանաչվել էին չկայացած, քանի որ ըստ Ընտրական օրենսգրքով սահմանված պահանջի` այստեղ առաջադրված չէր եղել երկու թեկնածու:
