Այսօր լրագրողների հետ զրույցում արդարադատության նախարար Հովհաննես Մանուկյանն անդրադարձավ կոռուպցիայի դեմ պայքարի հանձնաժողովի ձևավորման աշխատանքներին: Նա նշեց, որ հույս ունի, թե ընդդիմադիր պատգամավորները ևս կլինեն այդ հանձնաժողովում և այս պահին ընթանում է հանձնաժողովի ձևավորման գործընթացը:
«Այնտեղ կան հանձնաժողովի անդամներ, որոնք ի պաշտոնե են ընդգրկվում, կան քաղաքացիական հասարակության և ընդդիմադիր խմբակցությունների ներկայացուցիչներ»,- ասաց նա և նշեց, որ ըստ իր տեղեկությունների` խմբակցություններին հարցումներ են ուղարկվել, որպեսզի վերջիններս ներկայացնեն իրենց թեկնածուներին:
«Ես հույս ունեմ, որ այդ խմբակցություններն այնուամենայնիվ, կներկայացնեն անձանց և ներկայացված կլինեն խորհրդում»,- ասաց նա:
Հովհաննես Մանուկյանը համաձայնեց, որ որոշ ՀԿ-ներ ցանկացել են մաս կազմել խորհրդում, սակայն մերժվել են, և պատճառաբանեց, որ Կառավարության ընդունած որոշման համաձայն ` այս պահին երկու ներկայացուցիչ ունեն, իսկ մյուս հարցերը իրավիճակից կախված հետագայում կորոշեն:
Ինչ վերաբերում է հարցին, թե այդ կառույցի նկատմամբ շատերի մոտ վստահություն չկա, նախարարը նկատեց. «Հույս ունեմ, որ այն կազմակերպությունները, որոնք իսկապես ծանրակշիռ են, մեծ փորձառություն ունեն այս ոլորտում, գործին կմասնակցեն»,- ասաց նա:
Լրագրողներից մեկի հարցին ի պատասխան նա ասաց, որ հումորով է ընկալում, երբ ասվում է, թե ռեժիմը խուճապի մեջ է:
