«Կովկաս» ինստիտուտի տնօրեն, քաղաքագետ Ալեքսանդր Իսկանդարյանը որևէ նորություն չի տեսնում ՀՀ Նախագահի վերջերս արած այն հայտարարության մեջ, համաձայն որի Հայաստանի համար խնդիր է, որ Ռուսաստանը սպառազինում է Ադրբեջանին: Այսօր հրավիրված մամուլի ասուլիսին քաղաքագետն ընդգծեց, որ այս մասին խոսվել է բազմիցս:
«Մինչ օրս ինչ-որ մեկը չէ՞ր հասկանում, որ Ռուսաստանը զենք է վաճառում Ադրբեջանին, ի՞նչ է, սա նորությո՞ւն է, պետք էր, որ Նախագահը խոսե՞ր այս մասին, որ հասկանայինք: Ի՞նչ է, առաջին անգամ է այս մասին ասում Հայաստանի որևէ պաշտոնական դեմքը, դուք չե՞ք լսել արտգործնախարարի և պաշտպանության նախարարի հայտարարությունները այս հարցի շուրջ: Սերժ Սարգսյանն ասաց, որ Ռուսաստանը Հայաստանի համար կարևոր է, ոչ մի երկիր Հայաստանի համար չի արել ՌԴ-ի արածի մեկ տոկոսի չափով: Նաև ասաց, որ հայ զինվորները հաճույք չեն զգում նրանից, որ իրենց վրա կրակում են ռուսական զենքով»,- ասաց նա:
Ալեքսանդր Իսկանդարյանն ընդգծեց, որ ոչ մի էական նոր բան տեղի չի ունեցել ՀՀ Նախագահի հայտարարությամբ:
«Հայաստանի հիմանական ռազմական գործընկերը շարունակում է մնալ Ռուսաստանը: Հայաստանը նրանից է գնել զենք ու նրանից էլ շարունակելու է գնել: Ռուսաստանը բոլոր հետխորհրդային երկրների համար մնում է զենքի հիմնական մատակարարը: Իհարկե, հայերը գոհ չեն կարող լինել, որ Ռուսաստանը զինում է Ադրբեջանին: Ինչ վերաբերում է «ֆեյսբուքահայության» մեկնաբանություններին, որ Նախագահի ասածների մեջ նշաններ կան, կարծում եմ ճիշտ չէ»,- ասաց նա:
Քաղաքագետն ընդգծեց, որ Ռուսաստանում հասկանում են, որ Հայաստանի համար հաճելի չէ, որ զենք են վաճառում Ադրբեջանին, բայց Ռուսաստանը իր հետաքրքրություններ ունի ինչպես Ադրբեջանում, այդպես էլ Հայաստանում:
Հարցին, թե կարծիքներ է հնչում, որ երեկ ղարաբաղա-ադրբեջանական սահմանին տեղի ունեցած հարձակումը Ռուսաստանի պատասխանն է Հայաստանին Ադրբեջանի միջոցով, պատասխանեց. «Ես լուրջ քաղաքագետ եմ, բարձրագույն կրթություն ունեմ և չեմ կարող նման բաներ մեկնաբանել»: