Հայաստանի հանրապետական կուսակցության ԳՄ հերթական նիստից հետո լրագրողների հետ հանդիպմանը ՀՀԿ մամուլի խոսնակ Էդուարդ Շարմազանովն ասաց, որ ՀՀ Նախագահը ներկայացրել է Բրյուսել կատարած այցի մանրամասները:
Հայոց ցեղասպանության հարյուրամյա տարելիցին վերաբերող հարցերի վերաբերյալ ևս քննարկումներ եղել են։ «Հայոց ցեղասպանության հարյուրերորդ տարելիցին ընդառաջ եվրոպական մի շարք կառույցների դատապարտման գործընթացները կարևոր են: Վերջին մի քանի օրերի ընթացքում եվրոպական 4 կառույցի կողմից հնչել են դատապարտող հայտարարություններ: Սա շատ կարևոր է և ևս մեկ անգամ փաստում է, որ տարբեր հարթակներում ցեղասպանության ճանաչման հարցում հաջողել ենք»,–ասաց Էդուարդ Շարմազանովը:
ՀՀԿ ԳՄ նիստում քննարկվել է նաև մարտի 15-ին մի շարք համայնքներում կայացած տեղական ինքնակառավարմանմարմինների ընտրությունների հարցը:
«Ընտրատարածքների 70 տոկոսում հաղթել են ՀՀԿ-ական թեկնածուները: Սա նշանակում է, որ ՀՀԿ-ն համայնքներում շարունակում է վայելել մեծամասնության վստահությունը»,-ասաց Էդուարդ Շարմազանովը:
Նիստում անդրադարձ է եղել նաև սահմանային դեպքերին:
«Անթույլատրելի ենք համարել ուժի կիրառման, ապակայունացման ցանկացած փորձ: Ադրբեջանցիների կողմից նման հարձակումները արդյունք են Ադրբեջանի ղեկավարության ապակառուցողական քաղաքականության, մեզ այլ բան չի մնում, քան պատասխան տալ, ինչն էլ անում են մեր տղաները»,-հայտարարեց Էդուարդ Շարմազանովը:
