Այսօր «Ժառանգություն» կուսակցությունը քննարկում էր հրավիրել «Թուրքիայի Հանրապետության կողմից հայրենի բնօրրանի՝ Հայաստանի տարածքների բռնազավթումը և հայ ժողովրդի Մեծ հայրենազրկումը դատապարտելու մասին» թեմայով:
Իր բացման խոսքով «Ժառանգություն» կուսակցության առաջնորդ Րաֆֆի Հովհաննիսյանը նշեց, որ Հայոց ցեղասպանությունը ոչ միայն մեկուկես միլիոն հայի կորուստ էր, այլ հայրենիքի բռնի զրկում:
«Այսօր երբ հակառակորդը օկուպացման եզրույթներով է խոսում Արցախի մեր հայրենիքի մասին, արդեն ակնհայտ է դառնում որպես ազգային, ռազմավարական, մարտավարական հարց Թուրքիայի օկուպացիայի մասին բարձրաձայնելը»,- ասաց նա:
Քննարկմանը հրավիրված էր նաև Մարդու իրավունքների պաշտպան Կարեն Անդրիասյանը։ Նա խոսեց իր տարեկան զեկույցի մասին, որտեղ շատ կարևորվել է մարդու իրավունքների խախտման վերաբերյալ Թուրքիայի պատասխանատվության հարցը: Պաշտպանը ընթերցեց զեկույցի նախաբանը, որտեղ հանգամանալից նշված էր այդ մասին:
Նշենք, որ քննարկմանը իրենց ելույթով հանդես եկան նաև ԵՊՀ Արևելագիտության ֆակուլտետի փոխդեկան, բանասիրական գիտությունների թեկնածու, թուրքագետ Ռուբեն Մելքոնյանը, ազգագրագետ Հրանուշ Խառատյանը, «Մոդուս վիվենդի» կենտրոնի հիմնադիր Արա Պապյանը:
