«Բարգավաճ Հայաստան» խմբակցության ղեկավար Նաիրա Զոհրաբյանն այսօր ԱԺ նախագահ Գալուստ Սահակյանին առաջարկեց, որպեսզի ԱԺ բոլոր խմբակցությունները մինչև ապրիլի 24-ը համատեղ հայտարարություն ընդունեն և գնահատական տան վերջին օրերին Իրաքում լարվածության աճի պատճառով Հյուսիսային Իրաքի եզդիների նկատմամբ իրականացվող վայրագություններին: Դա, նրա խոսքով, ՀՀ Ազգային ժողովի բարոյական պարտքն է:
«Ինչ վերաբերում է Օսմանյան կայսրությունում եզդիների հետ տեղի ունեցածը ցեղասպանություն ճանաչելուն, համաձայն եք, որ դա իրապես լուրջ խնդիր է և իրականում փաստահավաք առաքելություն իրականացնելու և հանգամանալից քննարկման անհրաժեշտություն ունի, բայց այն, ինչ կատարվում է այսօր «Իսլամական պետություն» ահաբեկչական կազմակերպության կողմից եզդիների հանդեպ Հյուսիսային Իրաքում, կարծում եմ, որ գոնե մինչև ապրիլի 24-ը դրան խորհրդարանի բոլոր քաղաքական ուժերի կողմից պետք է տալ գնահատական»,-հայտարարեց Նաիրա Զոհրաբյանը՝ ընդգծելով, որ ՀՀ իշխանությունը պաշտպանել է ՄԱԿ-ի անվտանգության խորհրդի դիրքորոշումը «Իսլամական պետության» կողմից եզդիների հանդեպ անմարդկային վայրագությունների հարցում:
ԱԺ նախագահ Գալուստ Սահակյանն ի պատասխան ասաց, որ բոլորն այդ հարցում համամիտ են և որ կփորձի:
Ալ. Արզումանյանն էլ հիշեցրեց, որ հաջորդ ԱԺ նիստը արդեն ապրիլի 24-ից հետո է:
«Հայ ազգային կոնգրես» խմբակցության պատգամավոր Հրանտ Բագրատյանն էլ ԱԺ նախագահից հետաքրքրվեց, թե «ինչ է եղել» հայտարարության հետ, որում ԱԺ բոլոր քաղաքական ուժերը Հայոց ցեղասպանության հետ կապված հայտարարություն պետք է ընդունեն:
ԱԺ նախագահը նկատեց, որ հայտարարությունը շուտով կբաժանվի պատգամավորներին:
