«Արևելյան գործընկերության Ռիգայի գագաթաժողովին ընդառաջ» թեմայով հրավիրված խորհրդարանական լսումներին, որը նախաձեռնել էր ԱԺ եվրոպական ինտեգրման հարցերի մշտական հանձնաժողովը, «Ժառանգություն» խմբակցության պատգամավոր Թևան Պողոսյանը նկատեց, թե սեպտեմբերի 3-ից հետո թե՛ ԵՄ, թե՛ ՀՀ-ն գիտակցեցին, որ շահերն ավելի կարևոր են և պետք է դրանց հաստատման համար նոր ուղիներ փնտրել:
Պատգամավորը հարց է հնչեցնում, որ եթե կողմերը գիտակցում էին, որ ունեն երկուստեք շահեր, ինչո՞ւ գրեթե մեկ տարի տեղից չշարժվեցին:
«Երկու կողմն էլ, ըստ իս, սպասում էին ինչ-որ բանի, որ սայլը տեղից շարժվեր»,-պատասխանեց պատգամավորը իր իսկ հարցին։
Նա հորդորեց ԵՄ ներկայացուցիչներին անկեղծ լինել և հաստատել, որ ՀՀ-ն ուներ անվտանգության հարց և ըստ այդմ էլ շարժվեց՝ ընտրելով ԵՏՄ-ն: Նա նաև նշեց, որ նույն Եվրոպական նոր հարևանության ծրագրին միացած երկրների հարցում որևէ ձևով դժվար է ասել, որ այդ երկրներում վիճակը բարելավել է:
«Եթե նայում ենք նույն Արևելյան գործընկերության երկրներին, ապա այստեղ էլ պետք է ազնիվ լինենք և ասենք, որ այն երկրները, որոնք հանգիստ են միացել Ասոցացման համաձայնագրին, դրանք ունեն տարածքային կորուստներ՝ Վրաստան, Մոլդովա, երկու երկիր էլ, որոնք չունեին տարածքային կորուստ՝ Հայաստանն ու Ուկրաինան էին: Իսկ Ուկրաինայում տեղի ունեցածը բոլորս գիտենք»,-ասաց նա:
Թևան Պողոսյանը խոսեց հայկական կողմի և ԵՄ-ի՝ այս համաձայնագրից ակնկալիքներից:
«Հայկական կողմն ակնկալում է, որ ԵՄ անդամները շատ արագ մանդատի հարցը կլուծեն, և կլինի նոր համաձայնագիր, և ԵՄ-ն էլ, որ կունենա կոնսոլիդացիայի և ԱլԳ-ի մասին նոր պատկերներ»,-ասաց նա:
Թե ինչ է տալու Ռիգայի գագաթաժողովը ՀՀ-ի մասով՝ պատգամավորը կարող է կանխատեսել՝ վիզաների ազատականացման մասին շեշտադրումներ լինեն, Եվրոպական ծրագրերին կմասնակցեն, կլինեն քաղաքացիական, երիտասարդական, մշակութային ծրագրեր, միգուցե ազատ երկնքի հարցը կշոշափվի, նաև մարդու իրավունքների մասին հայտարարություն լինի:
«Հուսանք, որ Ռիգայից իրականում բոլորը կվերադառնան գործնական ծրագրերով»,-ասաց նա:
Նա նաև հարցրեց, թե ինչ է դրա համար առաջարկում ՀՀ-ն Ռիգայից առաջ:
«Պատասխանը մեր մեջ պետք է փնտրել, և թեպետ ՀՀ-ն հաստատում է իր պատրաստակամության մասին, բայց ներքին տեղաշարժ այնուամենայնիվ չեմ տեսնում»,-ասաց նա և նշեց, թե ՀՀ իշխանությունները մեկ ելք ունեն՝ ի վերջո պայքար տանել կոռուպցիայի, մենաշնորհների դեմ, անդրադառնալ երկրի արդիականացման այլ խնդիրներին։
«Ինձ թվում է՝ այս խնդիրները պետք է լուծվեն մեր սեփական միջոցներով ու ունակություններով»,-ասաց նա և հավելեց, թե դրա համար կամք է պետք, որը, սակայն, նա չի տեսնում:
